Sunnat qilish necha pul turadi?
Sunnat operatsiyasi tibbiy tilda — sirkumsizio yoki sirkumsiziya deb ataladi.
Sunnat operatsiyasini qayerda qilish mumkin?
Sunnat operatsiyasi xususiy klinikalarda ham, davlat shifoxonalarida ham pullik asosda amalga oshiriladi. Operatsiyani amalga oshirish uchun jarrohdan xizmat shartlarini aniqlashtirish zarur. Chunki barcha shifoxonalarda jarrohlar sunnat operatsiyasi bajarmasligi ham mumkin.
Ijtimoiy tarmoqlardagi ota-onalar qoldirgan sharhlarga ko‘ra, Toshkentda sunnat operatsiyasini amalga oshirish uchun asosan 10-sonli, 16-sonli, 40-sonli shahar shifoxonalari va 14-sonli bolalar shifoxonasiga murojaat qilishgan.
Xususiy klinikalarda esa bu xizmat rasmiy ro‘yxatga kiritilgan. Sunnat operatsiyasini amalga oshiradigan shifokorlar jarrohlik bo‘limida qabul qilishadi. Xususiy klinikalar va ularning sunnat qilish xizmatlari haqida batafsil ma’lumotni Med24 kabi saytlardan topish mumkin.
Sunnat operatsiyasining narxi
Sunnat operatsiyasining narxini aniqlash uchun avval jarroh ko‘rigidan o‘tish kerak. Xususiy klinikalarda jarrohning qabul narxi alohida to‘lanadi va narx 70 ming so‘mdan boshlanadi.. Poliklinikalarda esa jarrohning qabul qilishi bepul bo‘lsa-da, navbat kutish talab etiladi.
Toshkentdagi jarrohlar
Toshkentdagi davlat va xususiy klinikalarda faoliyat olib borayotgan jarrohlar
Ham xususiy klinikalarda, ham davlat shifoxonalarida operatsiya narxi jarrohning tajribasi, operatsiya usuli va qo‘shimcha tibbiy xizmatlarga bog‘liq bo‘ladi.
Masalan, Toshkentdagi bolalar shifoxonalaridan birida sunnat qilish uchun dastlab shifoxonaning kassasiga 250 ming so‘m to‘lanadi. Shundan so‘ng jarrohga alohida to‘lov amalga oshiriladi, bu miqdor kamida 250 ming so‘mdan boshlanadi. Agar jarroh taniqli bo‘lsa, narx bundan ham yuqori bo‘lishi mumkin.
Xususiy klinikalarda operatsiya narxi 400 ming so‘mdan boshlanadi va to‘liqligicha kassaga to’lanadi.
Toshkentdagi klinikalar
Toshkentdagi jarrohlik amaliyoti o'tkaziladigan klinikalar
Qo‘shimcha tibbiy xizmatlarning narxi
Ba’zi hollarda sunnat qilishda qo‘shimcha tibbiy xizmatlar talab qilinishi mumkin. Masalan, bolada ma'lum tashxislar mavjud bo‘lsa, operatsiyadan oldin umumiy qon tahlili olinadi.
- Umumiy qon tahlili: 30 ming so‘mdan boshlanadi.
Operatsiyadan so‘ng bolani o‘sha kuniyoq uyga olib ketish mumkin. Uy sharoitida parvarish uchun zarur bo‘lgan antiseptik vositalarni shifokor belgilaydi. Masalan, xlorgeksidin yoki fukorsin eritmasi, paxta tamponlar kabi vositalar tavsiya etilishi mumkin.
- Antiseptik eritmalar va operatsiyadan keyingi parvarish vositalari: 2000 so‘mdan boshlanadi.
Sunnat qilish usullari
Sunnat qilishning bir nechta usullari mavjud bo‘lib, har birining o‘ziga xos afzalliklari bor. To‘g‘ri usulni tanlash esa shifokorning tavsiyasi va bemorning holatiga bog‘liq.
- Lazer usuli: Bu zamonaviy usul kamroq qon ketishi va tiklanishning tezroq kechishi bilan ajralib turadi. Biroq, narxi yuqoriroq, chunki u zamonaviy uskunalar va tajribali mutaxassis talab etadi.
- Skalpel yoki qaychi yordamida: Bu ko‘p yillardan beri qo‘llanib kelinayotgan an’anaviy usuldir. Narxi nisbatan arzonroq bo‘lib, malakali jarroh tomonidan amalga oshirilganda, u ham samarali va xavfsiz hisoblanadi.
Sunnat qilish qanday amalga oshiriladi?
Sunnat qilish tibbiy amaliyot sifatida bir nechta bosqichlarda amalga oshiriladi:
- Tayyorgarlik: Bemorning terisi antiseptik bilan tozalanadi va operatsiya maydoni steril matolar bilan yopiladi.
- Og‘riqsizlantirish: Bemorga mahalliy yoki umumiy narkoz beriladi.
- Kesim: Teri qisqichlar yordamida ushlanadi va ortiqcha qismi lazer, skalpel yoki qaychi yordamida olib tashlanadi.
- Tikuv: Kesilgan joy tikiladi va antiseptik bilan ishlov beriladi.
Operatsiyadan keyingi parvarish
Operatsiyadan so‘ng sunnat qilingan joyni toza va quruq saqlash, antiseptik bilan muntazam ishlov berish va gigiyenaga e’tibor berish zarur. Shifokorlar odatda to‘liq tiklanish uchun 7-10 kun vaqt talab qilinishini tavsiya etadilar. Shish va noqulayliklar dastlabki kunlarda kuzatilishi tabiiy.
Agar operatsiyadan keyin harorat ko‘tarilsa yoki qon ketish kabi asoratlar yuzaga kelsa, darhol shifokorga murojaat qilish kerak.
Xulosa
Sunnat qilish (xatna) xizmati har doim pullik bo‘lib, Toshkentda uning narxi 400-500 ming so‘mdan boshlanadi. Bu borada tibbiy tashkilotning davlat yoki xususiy ekanligi katta ahamiyat kasb etmaydi — narx jarroh, operatsiya usuli va qo‘shimcha tibbiy xizmatlarga bog‘liq. Masalan, lazer usuli zamonaviy bo‘lib, tiklanish tezroq kechadi, lekin bu usulning narxi ancha yuqori bo‘lishi mumkin.
Ota-onalar sunnat qilishda klinikadan ko‘ra, ko‘proq jarrohning tajribasiga e’tibor qaratishadi va tanlovni ko‘pincha tanish-bilishlarning tavsiyalariga asoslaydilar. Xususiy klinikalarda jarroh qabuli pullik bo‘lsa, poliklinikalarda u bepul. Ammo ba’zi poliklinikalarda jarrohlar ushbu operatsiyani qilmasligi yoki navbat uzoq davom etishi ehtimoli bor. Shu sababli, sunnat qilishning umumiy narxi har bir oila uchun individual tarzda shakllanadi.