Qanday qilib Green card olish mumkin?

Lotereyada g‘olib bo‘lish green card (grinkarta)ni avtomatik ravishda qo‘lga kiritish degani emas. G‘oliblar bir nechta bosqichdan o‘tishlari kerak bo‘ladi: hujjatlarni tayyorlash, ularni ingliz tiliga tarjima qilish, pullik tibbiy ko‘rikdan o‘tish, konsullik to‘lovini amalga oshirish va elchixonadagi suhbatdan muvaffaqiyatli o‘tish. Barcha bosqichlardan so‘ng esa green card uchun alohida to‘lov to‘lash kerak bo‘ladi. 

Geen card nima?

Green card – Amerika Qo‘shma Shtatlarida (AQShda) doimiy rezidentlik maqomini tasdiqlovchi guvohnoma bo‘lib, AQSh fuqaroligini olish yo‘lidagi oraliq bosqich hisoblanadi.

• Green card egasining huquqlari: Ushbu hujjat green card egasiga AQSh hududida doimiy yashash, erkin kirib-chiqish, rasmiy ishlash yoki o‘z biznesini boshlash, ta’lim olish, sug‘urta va ijtimoiy ta’minotdan foydalanish hamda oila a’zolarini birlashtirish uchun ariza topshirish imkonini beradi. Green card olgandan so‘ng 5 yil davomida AQShda yashagan shaxs fuqarolik olish huquqiga ega bo‘ladi.
• Green card egasining majburiyatlari: Green card egalari AQSh qonunchiligiga amal qilishi, soliqlarni to‘lashi va yilning katta qismini mamlakat hududida o‘tkazishi shart. Agar shaxs AQShni 6 oydan ortiq muddatga tark etsa, green card bekor qilinishi mumkin.
• Green card, fuqarolik va viza o‘rtasidagi farq: Green card – bu pasport emas va AQSh fuqaroligini bermaydi. Green card egasi saylovlarda qatnasha olmaydi va o‘z mamlakati fuqarosi bo‘lib qolaveradi. 

Green card 10 yil davomida amal qiladi va bu muddat tugagach, uni yangilash mumkin.

Green card olish usullari

Green card olishning bir necha yo‘llari mavjud. Asosiylarini sanab o‘tamiz:

1. AQSh fuqarosi bilan nikohdan o‘tish. AQSh fuqarosi bilan turmush qurish – green card olishning eng keng tarqalgan usullaridan biridir. Biroq, nikohning haqiqiy ekanligini isbotlash talab etiladi. Ya’ni, nikoh soxtalashtirilmagan bo‘lishi kerak va bu munosabatlarning haqiqiyligiga dalillar keltirilishi lozim.

2. Oila a’zolari bilan birlashish. Bu usul AQShda yaqin qarindoshlari – turmush o‘rtoq, ota-ona, farzand, aka-uka yoki opa-singillari bo‘lganlar uchun mos. Bunday holda, oila a’zosi bo‘lish fakti asosida green card olish uchun ariza berish mumkin.

3. Ishchi vizani olish. Agar sizga AQShdan ish taklifi bo‘lsa, bu mamlakatga ishlash vizasi bilan kirib, keyinchalik green card olishga ariza berish imkonini beradi. Bu usul, ayniqsa, AQShda talab yuqori bo‘lgan soha mutaxassislari uchun mos.

4. Yuqori malakali mutaxassis sifatida kelish. O‘z sohasida yetakchi bo‘lgan san’atkorlar, olimlar, sportchilar va boshqa yuqori malakali mutaxassislar uchun AQSh green card olish imkonini beradi. Ammo nomzodning noyobligini isbotlash kerak bo‘ladi. Masalan, taniqli ilmiy xodimlar, professorlar yoki san’atkorlar o‘zlarining muvaffaqiyatlari va yutuqlari bilan isbotlashi lozim.

5. Siyosiy boshpana olish yoki qochqin sifatida kelish. O‘z mamlakatida ta’qib yoki xavf-xatar tufayli qololmaydiganlar uchun AQShga qochqin sifatida kelib, green card olish imkoniyati mavjud. Bu usul ko‘pincha urush yoki qattiq ta’qib ostidagi shaxslar uchun mos keladi.

6. AQSh iqtisodiyotiga sarmoya kiritish. Agar tadbirkor yoki sarmoyador bo‘lsangiz, kamida 1 050 000 AQSh dollari sarmoya kiritib, AQShda kamida 10 ta yangi ish o‘rni yaratsangiz, green card olish imkoniga ega bo‘lasiz.

7. Maxsus lotereyada yutish. Green cardni lotereyada yutib olish ham keng tarqalgan usullardan biri. Har yili minglab odamlar shu usul bilan AQShga ko‘chib o‘tish imkoniga ega bo‘lishadi.

Ushbu usullarning har biri o‘ziga xos talablar va jarayonlarga ega. Quyida esa aynan lotereya orqali green card olish jarayonini yoritamiz.

Green card lotereyasi 

Green card lotereyasi (Electronic Diversity Visa Lottery yoki DV-Lottery) — AQSh Davlat departamenti tomonidan o‘tkaziladigan dastur bo‘lib, deyarli har bir insonga green card yutib olish imkoniyatini beradi. Lotereyaning har yilgi nomlanishi "DV" harflari va viza intervyulari yakunlanadigan yil bilan belgilanadi. Masalan, 2023-yilda qabul qilingan arizalar DV-2025 nomi bilan o‘tkaziladi, 2022-yilda esa DV-2024 edi.

Lotereyaning asosiy maqsadi — oxirgi 5 yil ichida AQShga 50 mingdan kam immigrant yuborgan davlatlardan ko‘chib o‘tishni rag‘batlantirish. Green card lotereyasi har yili oktyabr oyining boshidan noyabr oyining boshigacha o‘tkaziladi. Ishtirok etish uchun lotereyaning rasmiy veb-saytida maxsus shaklni to‘ldirish kifoya va bu butunlay bepul. G‘oliblar esa avtomatik tarzda maxsus dastur yordamida tasodifiy ravishda tanlanadi.

Foto: profile.ru

Kimlar Green card lotereyasida ishtirok etishi mumkin?

Green card lotereyasida ishtirok etish uchun bir necha muhim talablarga javob berish kerak:

1. Tug‘ilgan mamlakat: Green card lotereyasida qatnashish uchun ruxsat etilgan davlatlardan birida tug‘ilgan bo‘lish kerak. Quyidagi davlatlarda tug‘ilganlar lotereyada ishtirok eta olmaydi: Bangladesh, Braziliya, Venesuela, Vyetnam, Gaiti, Gonduras, Hindiston, Dominika Respublikasi, Kanada, Xitoy (shu jumladan Gonkong), Kolumbiya, Salvador, Meksika, Nigeriya, Pokiston, Filippin, Janubiy Koreya va Yamayka. Ammo Makaoda va Tayvanda tug‘ilganlar ishtirok etishlari mumkin.
   • Istisnolar: Agar siz ishtirok etish taqiqlangan mamlakatda tug‘ilgan bo‘lsangiz, turmush o‘rtog‘ingizning yoki ota-onangizning tug‘ilgan mamlakati orqali qatnashishingiz mumkin. Ota-onangiz doimiy yashamagan davlatda tug‘ilgan bo‘lsangiz, ular orqali ham ishtirok etish imkoniyati mavjud.
2. Ta’lim yoki ish tajribasi: Lotereyada qatnashish uchun 11-sinfni tamomlagan bo‘lish yoki oxirgi besh yil ichida kamida ikki yillik ish tajribasiga ega bo‘lish kerak. Agar siz o‘rta ma’lumotga ega bo‘lmasangiz, kasbingiz AQSh mehnat tizimida yuqori malakali deb baholanishi lozim. Bunda kasbingiz "Job Zone" 4 yoki 5-zonaga kirishi va darajasi 7 yoki undan yuqori bo‘lishi kerak. O‘z kasbingizning mosligini rasmiy sayt orqali "Job Family" tugmasidan tekshirishingiz mumkin.
3. Yosh va til talablari: Yosh bo‘yicha rasmiy cheklovlar yo‘q, lekin o‘rta ma’lumot yoki ish tajribasi talab qilinishi sababli 17—18 yoshdan kichiklarning ishtirok etish ehtimoli kam. Ingliz tilini bilish majburiy emas.
4. Boshqa vizalar va yutuqni o‘tkazish: Lotereyada ishtirok etish uchun boshqa immigratsion vizalarga ariza topshirgan bo‘lishingiz halaqit bermaydi. Sayyohlik vizasi olishda lotereyada qatnashganingizni yashirmaslik kerak, bu sizning halolligingizni ko‘rsatadi. Yutuqni boshqa birovga o‘tkazishning iloji yo‘q – g‘olib faqat o‘zi va oila a’zolari bilan AQShga ko‘chib o‘tishi mumkin.

Ishtirok uchun boshqa qo‘shimcha shartlar yo‘q, lekin yutuqdan keyin viza olish uchun ba’zi talablar bajarilishi kerak: g‘oliblar tibbiy ko‘rikdan o‘tib, zarur emlashlarni qabul qilishlari va xavfli kasalliklardan xoli ekanliklarini tasdiqlashlari zarur. Shuningdek, ular jinoiy jazodan ozod bo‘lishlari shart.

Qanday hujjatlar kerak bo‘ladi?

Lotereyada ishtirok etish uchun faqat to‘ldirilgan anketa va olti oydan oshmagan fotosurat kerak bo‘ladi. Chet el pasporti ma’lumotlarini kiritish talab etilmaydi.

Lotereya o‘tkazilish vaqti

Arizalar odatda lotereya boshlanishidan yarim yil oldin, kuzda qabul qilinadi. Masalan, 2023-yilda Green card lotereyasi 4-oktabrdan 7-noyabrgacha o‘tkazilgan edi. Arizani faqat belgilangan muddatda topshirish mumkin, erta yoki kech topshirib bo‘lmaydi.
Arizani qaysi kuni topshirishingiz muhim emas, ammo uni kechikmasdan to‘ldirish yaxshiroq. Agar er-xotin har biri green card lotereyasi uchun arizani alohidadan topshirsa, g‘olib bo‘lish imkoniyati ikki barobarga ortadi, chunki yutgan turmush o‘rtog‘i oilasini ham olib ketishi mumkin.

Yutuqdan keyin nima qilish kerak?

Green card lotereyasida g‘olib bo‘lish hali suhbatga taklif qilinishingizni kafolatlamaydi. Green card dasturi 55 mingta viza berilgandan keyin yopiladi, lekin lotereya g‘oliblari odatda bundan ko‘proq bo‘ladi. Shuning uchun har bir g‘olibga individual raqam beriladi va har oy Davlat departamenti viza byulletenini e’lon qiladi. Byulleten orqali har bir mintaqa uchun yuqori chegaralar – "case" raqami (cut-off) ko‘rsatiladi. Faqat shu chegaradan past raqamga ega bo‘lganlar suhbatga taklif qilinadi. Chegaradan yuqori raqamga ega bo‘lganlar navbatini kutishadi. Agar byulleten "current" statusini ko‘rsatsa, bu shu mintaqadagi barcha ishtirokchilar suhbatga taklif qilinishini anglatadi.

Foto: grib-foto.ru

Misol uchun, agar dekabr oyida cut-off raqami 5900 bo‘lsa va sizning raqamingiz 6000 bo‘lsa, siz shu oyda suhbatga taklif qilinmaysiz va keyingi oylarning cut-off oshishini kutishingiz kerak bo‘ladi.

DV lotereyasi g‘oliblari uchun suhbatdan o‘tish muddati yilning 1-oktabridan boshlanadi va 30-sentyabrda tugaydi. Masalan, DV-2024 g‘oliblari 2023-yil 1-oktabrdan 2024-yil 30-sentyabrgacha suhbatdan o‘tishlari kerak bo‘ladi. Shu muddatda 55 mingta viza tarqatilib bo‘linsa, suhbatlar belgilangan muddatdan oldin to‘xtatiladi.

Shu sababli, raqamingiz qanchalik baland bo‘lsa va cut-off sekin o‘sayotgan bo‘lsa, konsullikka suhbatga chaqirilish imkoniyati kamayadi.

Green cardga ariza berishda vositachilardan foydalansa bo‘ladimi?

Internetda green card lotereyasida ariza to‘ldirishda yordam yoki g‘alabani kafolatlashni va’da qiladigan vositachilar ko‘p. Bunday xizmatlardan foydalanish tavsiya etilmaydi.

Birinchidan, arizani mustaqil to‘ldirish oson — bu atigi 10 daqiqa vaqt oladi. Ikkinchidan, vositachilar ko‘pincha firibgar bo‘lib chiqadi. G‘oliblar maxsus dastur orqali tasodifiy tanlanadi, shuning uchun hech kim yutuqqa kafolat bera olmaydi. Lotereyada ishtirok etish doim bepuldir, va agar sizdan to‘lov talab qilinsa, bu firibgarlikdir.

Firibgarlik usullari:

• Vositachilar sizning arizangizni o‘z elektron pochtalari orqali yuborishi mumkin. G‘olib bo‘lsangiz, ular tasdiqlash raqamini sizga pul evaziga berishi mumkin. Shuningdek, o‘zingiz mustaqil ariza yuborsangiz, Green card tizimi ikkita arizani topib, diskvalifikatsiya qilishi mumkin.
• Firibgarlar sizning ma’lumotlaringizdan foydalanib, nomingizdan ariza yuboradi. Agar yutsangiz, ular yutuqni tasdiqlash uchun sizdan pul talab qilishi yoki soxta nikohni taklif qilishi mumkin.

AQSh Davlat departamenti firibgarlikka qarshi kurashadi va firibgarlarning IP-manzillari hamda elektron pochtalarini kuzatadi. Firibgarlik bilan bog‘liq arizalar rad etiladi.

Green card arizasiga suratga tushish

Green cardga ariza topshirishdan oldin suratga tushish va uni raqamli shaklda tayyorlash kerak. Suratga qat’iy talablar mavjud va ular barcha oila a’zolari uchun amal qiladi. 

Green card lotereyasiga ariza topshirish uchun taqdim etilishi kerak bo‘lgan surat namunalari

Mana asosiy talablar:

• Yangi surat: Surat green cardga ariza topshirishdan 6 oydan ko‘proq oldin olingan bo‘lmasligi kerak.
• Rang va o‘lcham: Surat rangli, kvadrat shaklda bo‘lishi kerak. Bosh markazda joylashib, suratning 50—69% ni egallashi lozim. Raqamli surat hajmi kamida 600×600 piksel, maksimal hajmi 240 Kb bo‘lishi kerak. JPG formatida saqlanadi.

To'g'ri rasmga tushish qoidalari

• Tiniqlik: Surat tiniq va bir xil yorug‘likda, soyasiz, teri rangini aniq ko‘rsatib beruvchi bo‘lishi kerak. Suratni retush qilish, fotoredaktorda qayta ishlash yoki o‘zgartirish mumkin emas.
• Kiyim: Oddiy kiyimda, ko‘zoynak va bosh kiyimsiz suratga tushing. Harbiy kiyim mos emas, ammo diniy yoki tibbiy sabablarga ko‘ra kiygan kiyimingiz bo‘lsa, u bilan suratga tushish mumkin.
• Yuz ifodasi: Kameraga to‘g‘ri qarang, yuzingiz ifodasiz bo‘lsin, ko‘zlar aniq ko‘rinib tursin. Sochlar yuzni to‘smasligi kerak.

Agar green card olish uchun ariza yuborishda bolalaringiz bilan murojaat qilayotgan bo‘lsangiz, har bir bola uchun alohida maydon to‘ldirib, fotosuratni ilova qiling. Suratlar quyidagi talablarga mos bo‘lishi kerak:

• Bolalar uchun: Suratda boshqa odamlar bo‘lmasligi kerak. Bola kameraga to‘g‘ri qarasin va yuz ifodasi neytral bo‘lsin. Yangi tug‘ilgan chaqaloqning ko‘zlari yarim yopiq yoki yopiq bo‘lishi mumkin. Chaqaloqni oq yoki unga yaqin rangdagi mato ustiga yotqizib suratga oling.

Green cardga ariza topshirish 

Internetda green card lotereyasida ishtirok etish uchun arizani to‘ldirishni taklif qiladigan ko‘plab soxta saytlar mavjud. Lekin, yagona rasmiy veb-sayt — dvprogram.state.gov. Shaklni faqat shu saytda, lotin alifbosida, ingliz tilida to‘ldirish kerak. 

Green cardga ariza shaklini to‘ldirish uchun 60 daqiqa vaqt ajratiladi. Agar bu vaqt ichida shaklni to‘ldirib ulgurilmasa, tizim arizani o‘chiradi va sizga yangidan boshlashga to‘g‘ri keladi. Green card arizasini to‘liq to‘ldirish majburiy – qisman to‘ldirilgan arizalar diskvalifikatsiya qilinadi. Shaklni yuborishdan oldin barcha ma'lumotlarni, jumladan imlo xatolarini tekshirish imkoniyati mavjud, ammo shakl yuborilgach, o‘zgartirish kiritishning imkoni yo‘q.

Green card ariza shaklini to‘ldirishdan oldin, ingliz tilidagi rasmiy ko‘rsatmalarni diqqat bilan o‘qib chiqing. 

Green card arizasining shakli ikki qismdan iborat bo‘lib, birinchi qismda arizachining ma’lumotlari, ikkinchi qismda esa uning turmush o‘rtog‘i yoki farzandlari haqidagi ma’lumotlar to‘ldiriladi.

Rasmiy lotereya veb-saytining boshlang'ich sahifasi. Green card arizasini to'ldirishni boshlash uchun "Begin Entry" tugmasini bosish kerak.

1. Arizachining ma'lumotlari:

1. Ism: "Last/Family Name" – familiya, "First Name" – ism. Ularni pasportda qanday yozilgan bo‘lsa, shunday kiriting. Agar otasining ismi pasportda ko‘rsatilmagan bo‘lsa, "Middle Name"ni bo‘sh qoldirib, "No Middle Name"ni belgilang.

2. Jinsi (Gender): O‘zingizga mos keladigan variantni tanlang: "Male" – erkak, "Female" – ayol.

3. Tug‘ilgan sana (Birth Date): Oy, kun, va yil ketma-ketligida kiriting.

Anketada sanalarni yozish tartibi: oy, kun, yil.

4. Tug‘ilgan joy (City Where You Were Born): Tug‘ilganlik haqidagi guvohnomada ko‘rsatilgan shahar yoki qishloq nomini kiriting. Agar nom o‘zgargan bo‘lsa, hozirgi nomini yozing.

5. Tug‘ilgan mamlakat (Country Where You Were Born): Tug‘ilgan mamlakatni tanlang. Agar SSSRda tug‘ilgan bo‘lsangiz, hozirgi mamlakat nomini kiriting.

Bu bo'limda tug'ilgan mamlakatingizni tanlang - fuqarolikni emas

6. DV-lotereyada ishtirok etish huquqiga ega mamlakat (Country of Eligibility for the DV Program): Agar tug‘ilgan mamlakat lotereyada qatnasha olmasa, turmush o‘rtog‘ingiz yoki ota-onangizning mamlakatini tanlash imkoniyati bor. Buning uchun "No" ni belgilang va kerakli mamlakatni tanlang.

7. Ishtirokchining surati (Entrant Photograph): Suratni yuklash uchun "Choose New Photo" tugmasini bosing. Surat 6 oydan eski bo‘lmasligi va retush qilinmagan bo‘lishi kerak.

8. Pochta manzili (Mailing Address): Sizga hujjatlar yuborilishi mumkin bo‘lgan manzilni kiriting.

Keyingi kataklarda:

• In Care Of: Mabodo vafot etsangiz, kimga murojaat qilish kerakligini ko‘rsating yoki bo‘sh qoldiring.
• Address Line 1 va 2: Ko‘cha, uy va xonadon raqamini kiriting.
• City/Town: Shahar yoki qishloq nomini yozing.
• District/Province: Viloyat yoki tuman nomini kiriting.
• Postal Code/Zip Code: Pochta indeksini yozing yoki "No Postal Code"ni belgilang.

9. Yashash mamlakati (Country Where You Live Today): Hozirda yashayotgan mamlakatingizni tanlang.

10. Telefon raqami (Phone Number): Maydonni bo‘sh qoldirish yoki mobil yoki uy telefon raqamini kiritish mumkin.

11. Elektron pochta manzili (E-mail Address): Amal qiladigan elektron pochta manzilini ikki marta yozing.

12. Ta’lim darajasi (What is the highest level of education you have achieved, as of today?)
Ta’lim darajangizni tanlang:

• Primary school only — boshlang‘ich maktab;
• High School, no degree — tugallanmagan o‘rta maktab;
• High School degree — o‘rta maktabni tugatib, attestatga ega bo‘lish;
• Vocational School — kasb-hunar maktabi, litsey yoki texnikum;
• Some University Courses — to‘liq bo‘lmagan oliy ta’lim;
• University Degree — oliy ta’lim (bakalavr diplomi);
• Some Graduate Level Courses — tugallanmagan magistratura, kamida bir yakuniy imtihon topshirilgan holat;
• Master’s Degree — magistr diplomi;
• Some Doctorate Level Courses — tugallanmagan aspirantura yoki doktorantura, kamida bir kandidatlik imtihoni topshirilgan holat;
• Doctorate Degree — fan nomzodi yoki fan doktori darajasi.

AQSh va O‘zbekiston ta’lim tizimlari farqli bo‘lgani sababli, bu taxminiy moslik.

13. Oilaviy holat (Marital Status): O‘zingizga mos keladigan variantni tanlang:

• Unmarried — ilgari turmushga chiqmagan yoki uylanmagan;
• Married — turmush qurgan/yosh oila qurgan;
• Married and my spouse is NOT a U.S. citizen or U.S. Lawful Permanent Resident — AQSh fuqarosi yoki rezidenti bo‘lmagan turmush o‘rtog‘i bilan turmushda;
• Married and my spouse IS a U.S. citizen or U.S. Lawful Permanent Resident (LPR) — AQSh fuqarosi yoki rezidenti bilan turmushda;
• Divorced — ajrashgan;
• Widowed — beva/beva;
• Legally Separated — qonuniy ajratilgan. (O‘zbekistonda bu holatga teng tushuncha yo‘q, ushbu variantni tanlamaslik tavsiya etiladi).

Agar siz AQSh fuqarosi yoki green card egasi bilan turmush qurgan bo‘lsangiz, uni arizangizda ko‘rsatmasligingiz kerak.

14. Farzandlar soni (Number of Children): 21 yoshgacha bo‘lgan farzandlarning sonini kiriting. Agar farzandlar bo‘lmasa, bu bandni o‘tkazib yuboring.

Green card ariza shakllarining barcha bandini to‘g‘ri to‘ldirganingizga ishonch hosil qilib, "Continue" tugmasini bosing. Agar biror ma'lumotni unutgan bo‘lsangiz yoki noto‘g‘ri foto yuklagan bo‘lsangiz, tizim sizga xatolarni ko‘rsatadi va keyingi sahifaga o‘tishga ruxsat bermaydi.

Agar barcha ma'lumotlar to‘g‘ri bo‘lsa, lekin brauzer xato berib, keyingi sahifaga o‘tmasa, ehtimol anketa to‘ldirishda 60 daqiqadan ko‘proq vaqt sarflagansiz yoki eski brauzerdan foydalanayotgan bo‘lsangiz. Bu holatda, green card arizasini yangidan to‘ldirishga yoki boshqa brauzerni sinab ko‘rishga harakat qiling.

2. Oila a’zolari haqida ma’lumot (Derivatives)

Agar turmush qurgan bo‘lsangiz yoki farzandlaringiz bo‘lsa, green card arizasining ikkinchi qismini ham to‘ldirishingiz kerak. Green cardga ariza to‘ldirishda har bir oila a’zosi uchun alohida surat talab qilinadi. To'ldirish qoidalari bir xil.

Hammasi tayyor bo‘lgach, "Continue" tugmasini bosing. Shundan so‘ng, kiritilgan barcha ma’lumotlar ko‘rsatilgan sahifa ochiladi. Diqqat bilan tekshirib chiqing: agar xatolar bo‘lsa, ularni tuzating. Hammasi to‘g‘ri bo‘lsa, yana "Continue" tugmasini bosing – shu bilan green card arizasi yuborilgan hisoblanadi.

Keyin arizaning qabul qilinganini bildiruvchi sahifa paydo bo‘ladi. Unda 16 ta raqam va harflardan iborat tasdiqlash raqami (Confirmation Number) ko‘rsatiladi. Bu raqam juda muhim – uni yo‘qotmaslik uchun chop eting, skrinshot qiling yoki elektron pochta orqali yaqin odamingizga yuboring. Ushbu raqam orqali kelgusi yilning may oyida natijalarni tekshirib, yutganingizni bilib olasiz.

Green cardga ariza to‘ldirishda tez-tez uchraydigan xatoliklar

Green card lotereyasida ishtirok etish uchun ariza to‘ldirishda eng ko‘p uchraydigan xatolar quyidagilardir:

1. Noto‘g‘ri surat: Surat o‘tgan yilga tegishli yoki 6 oydan oldin olingan bo‘lsa, ariza qabul qilinmaydi. Surat belgilangan talablarga mos bo‘lishi kerak – masalan, qorong‘i fonda olingan yoki shaxs ko‘zoynakda bo‘lsa, xatolik hisoblanadi. Retush qilingan yoki grafik tahrirlovchi dasturlar yordamida o‘zgartirilgan suratlar ham qatnashish imkoniyatini yo‘qqa chiqaradi.
2. Shaxsiy ma’lumotlardagi xatoliklar: Familiya, ism yoki boshqa hujjatlardagi ma’lumotlarda xatoliklar arizani rad etishga sabab bo‘lishi mumkin.
3. Oilaviy ma’lumotlarning noto‘g‘ri kiritilishi: Turmush o‘rtoqlar va farzandlar haqida noto‘g‘ri ma’lumot kiritish, masalan, farzandlar soni yoki oilaviy holatni noto‘g‘ri ko‘rsatish – jiddiy xato hisoblanadi.
4. Bir nechta arizani topshirish: Green card lotereyasi uchun har bir ishtirokchi faqat bitta ariza topshirishi kerak. Bir nechta nusxadagi arizalar avtomatik ravishda diskvalifikatsiya qilinadi.

Green card lotereyasida yutganingizni qanday tekshirish mumkin?

Green card lotereya natijalarini ariza topshirilganidan keyingi yilning may oyida tekshirish mumkin. Masalan, DV-2025 natijalari 2024-yil 4-may kuni e’lon qilindi.

Natijalarni ko‘rish uchun green card lotereyasining rasmiy saytiga kirib, "Check Status" tugmasini bosing. So‘ngra, ariza topshirgandan keyin berilgan tasdiqlash raqami (Confirmation Number), familiyangiz, tug‘ilgan yilingiz va sahifada ko‘rsatilgan tasdiqlash kodini kiriting.

Agar green card lotereyasining natijalarini tekshirishni unutsangiz, sizga hech kim g‘alaba haqida xabar bermaydi. Sizga g‘alaba haqida xabar kelsa, bu – firibgarlik alomati. Ba’zan Davlat departamenti sizga arizangiz holatini "Entrant Status Check" bo‘limida tekshirishingizni eslatishi mumkin, lekin bu g‘oliblikni anglatmaydi. Bu faqat hali green card natijalarini tekshirmagan g‘oliblarni topishga qaratilgan.

Agar tasdiqlash raqamini yo‘qotib qo‘ysangiz, xavotir olmang – uni qayta tiklash mumkin. Green card lotereyasining saytida ro‘yxatdan o‘tishda ko‘rsatgan elektron pochta manzilingiz yordamida "Entrant Status Check" bo‘limida so‘rov yuborib, tasdiqlash raqamini qayta olishingiz mumkin.

Green card yutib olgandan keyin nima qilish kerak?

Green card lotereyasida g‘olib bo‘lish hali green card olishni kafolatlamaydi. AQShga ko‘chib o‘tish uchun yana bir qancha muhim bosqichlarni bajarish kerak: hujjatlarni yig‘ish, tibbiy ko‘rikdan o‘tish, elchixonada suhbatdan muvaffaqiyatli o‘tish, konsullik yig‘imini to‘lash va yangi joyda yashash uchun yetarli mablag‘ingiz borligini isbotlash. Ushbu jarayon bir yarim yilgacha cho‘zilishi mumkin, va g‘oliblarning yarmidan ko‘pi bu bosqichlarni o‘ta olmasligi mumkin. 

Quyida asosiy qadamlarni ko‘rsatamiz, to‘liq ma’lumot bilan esa alohida maqolamizda tanishib chiqishingiz mumkin.

1. DS-260 immigratsion viza anketasini to‘ldirish
Anketani Consular Electronic Application Center saytida to‘ldirish kerak. Shaxsiy va oilaviy ma'lumotlarni kiritish va oila tarkibidagi o‘zgarishlarni ko‘rsatish zarur. Har bir oila a’zosi uchun alohida anketani to‘ldirish talab etiladi.

2. Suhbat uchun hujjatlarni tayyorlash
DS-260 anketasini to‘ldirgandan so‘ng, tasdiqlash sahifasini chop eting va kerakli hujjatlarni yig‘ing. Hujjatlar asl nusxada va ingliz tiliga tarjima qilingan bo‘lishi kerak, lekin notarial tasdiq talab qilinmaydi.

3. Suhbatga taklifnoma olish
Viza anketasi to‘ldirilgach, suhbatga taklifnoma lotereya saytida paydo bo‘lishi yoki elektron pochtangizga kelishi mumkin. Raqamingiz viza byulletenidagi yuqori chegaradan past bo‘lsa, suhbatga chaqirilasiz.