20 millionlik omonatdan qaysi bankda eng katta foyda olish mumkin?
Foto: quote.ru
Belgilangan miqdorli omonatlar
Tasavvur qiling, sizda 20 million so‘m bor va maqsadingiz — bu mablag‘dan maksimal daromad olish. Hisobdagi pulni muddat yakuniga qadar ishlatmaslikka va to‘ldirmaslikka tayyorsiz. Bunday sharoitda belgilangan miqdorli omonatlar yaxshi yechim bo‘ladi.
Odatda, yuqori foizlar aynan shunday, nisbatan uzoq muddatli va mablag‘ yechilmaydigan omonatlarga taalluqli. Ular maksimal daromadni kafolatlaydi, ammo asosiy kamchiligi — mablag‘dan foydalanish imkoniyati cheklangan.
Masalan, ba’zi banklar yillik 26% foiz stavkasi bilan quyidagi shartlarni taklif qiladi:
TBC Bank "Muddatli", Davr Bank “Kafolat”, Anor Bank “Bayramona”:
- Yillik foiz stavkasi: 26%
- Muddat: 13 oy
- Boshlang‘ich pul miqdori: 20 million so‘m
- 13 oy oxiridagi umumiy daromad: 5 633 333 so‘m
- Umumiy pul miqdori: 25 633 333 so‘m
TBC bankning 26%li omonat kalkulyatori
Oylik to‘ldirib boriladigan omonatlar
Agar 20 million so‘mni omonatga qo‘yib, har oy daromadni tezroq ko‘paytirish maqsadida yana mablag‘ qo‘shmoqchi bo‘lsangiz, to‘ldirib boriladigan omonat maqbul tanlov bo‘ladi. Bunday omonatlarda qo‘shimcha mablag‘ kiritilganida, bank qo‘shilgan mablag‘ga yangi foizlarni hisoblaydi, bu umumiy daromadning oshib borishini ta’minlaydi. To‘ldiriladigan omonatlarning foizi odatda nisbatan biroz pastroq bo‘ladi.
TBC Bank va Universal Bankda qo‘shimcha mablag‘ kiritish imkoniyatini beruvchi yuqori foizli omonatlar mavjud. Ushbu banklarning takliflari misolida har oy bir million so‘mdan pul qo‘shilganda daromad qanday bo‘lishini ko‘rib chiqamiz:
TBC Bank "To'ldiriladigan muddatli"
- Yillik foiz stavkasi: 24%
- Muddat: 13 oy
- Boshlang‘ich pul miqdori: 20 million so‘m
- Oylik to‘ldirish: bir million so‘m
- 13 oy oxiridagi umumiy daromad: 8 330 301 so‘m
- Umumiy pul miqdori: 41 330 301 so‘m
Universal Bank "Yuksalish"
- Yillik foiz stavkasi: 23%
- Muddat: 13 oy
- Boshlang‘ich pul miqdori: 20 million so‘m
- Oylik to‘ldirish: bir million so‘m
- 13 oy oxiridagi umumiy daromad: 7 203 967 so‘m
- Umumiy pul miqdori: 40 203 967 so‘m
Qisman yechish imkoniyati mavjud omonatlar
Agar sizda 20 million so‘m bo‘lib, uni saqlash va ko‘paytirishni xohlasangiz, lekin yil davomida mablag‘ning bir qismini yechib olish ehtimoli mavjud bo‘lsa, qisman yechish imkoniyatiga ega omonatlar qulay tanlov.
Bunday omonatlar zarurat tug‘ilganda, hisobni butunlay yopmasdan kerakli mablag‘ni olish imkoniyatini beradi. Shu bilan birga, hisobda qolgan mablag‘ uchun foiz hisoblanishda davom etadi, bu asosiy mablag‘dan daromad olishni davom ettirish imkonini saqlaydi.
Tenge Bank taklifi misolida:
Tenge Bank “Qulay onlayn”
- Yillik foiz stavkasi: 22%
- Muddat: 13 oy
- Boshlang‘ich pul miqdori: 20 million so‘m
- 13 oy oxiridagi umumiy daromad: 4 761 644 so‘m
- Umumiy pul miqdori: 24 761 644 so‘m
Tenge Bankning "Qulay" omonati
Daromadlarni taqqoslash
Quyida taqqoslash uchun 13 oy muddat va 20 million so‘mlik omonat misol sifatida olingan:
| Omonat turi | Bank | Yillik foiz stavkasi | Oylik to‘ldirish | Umumiy daromad (so‘mda) | Afzalliklari | Kamchiliklari |
| Uzoq muddatli | TBC Bank, Davr Bank, Anor Bank | 26% | Yo‘q | 5 633 333 | Eng yuqori foiz | Mablag‘ni tegish mumkin emas |
| Oylik to‘ldirish imkoniyati bilan | TBC Bank | 24% | 1 mln so‘m | 8 330 301 | Har oy qo‘shimcha mablag‘ qo‘shish imkoniyati | Foiz stavkasi pastroq |
| Universal Bank | 23% | 1 mln so‘m | 7 203 967 | |||
| Qisman yechish mumkin bo‘lgan | Tenge Bank | 22% | Mumkin | 4 761 644 | Qisman yechish va mablag‘ qo‘shish imkoniyati | Nisbatan past daromad |
Bank shartlari 2024-yilning 8-noyabr sanasiga ko‘ra keltirilgan bo‘lib, ular o‘zgarishi yoki boshqa banklarda yaxshiroq shartlar paydo bo‘lishi mumkin.
Xulosa
Yil davomida mablag‘ni tegmasdan saqlamoqchi bo‘lganlar uchun qo‘shimcha mablag‘ qo‘shish yoki qisman yechish imkoniyati bo‘lmagan, yuqori foizli (26%) omonatlar – masalan, TBC Bank, Davr Bank va Anor Bank takliflari – yaxshi tanlov hisoblanadi.
Shuni unutmaslik kerakki, muddatidan oldin yechib olinsa, foizlar odatda pastroq (20% yoki 22%) hisoblanadi. Shuningdek, har bir bankning o‘z shartlari mavjud, shuning uchun ma'lum bankning taklifini tanlashdan oldin ularning barcha shartlarini diqqat bilan o‘rganish tavsiya etiladi. Masalan, Davr Bankda dastlabki 6 oy davomida omonatni to‘ldirish imkoniyati mavjud.
Agar mablag‘ni har oy oshirib borish muhim bo‘lsa, to‘ldirish imkoniyati mavjud omonatlar yaxshi tanlov. Har oy tushgan foiz va qo‘shimcha bir million so‘m qo‘shib borish daromadni sezilarli oshiradi, chunki foizlar yangilangan umumiy summaga hisoblanadi.
