Dubayga arzon sayohat qilish mumkinmi?

Poytaxt shahar bo‘lgan Abu-Dabi va osoyishta Sharja shahri o‘rtasida joylashgan Dubayni Birlashgan Arab Amirliklarining “yuragi” deb atash mumkin. Bu amirlik ochiq va zamonaviy ko‘rinishga ega bo‘lib, uning ko‘chalarida an’anaviy liboslardagi mahalliy aholini ham, zamonaviy uslubdagi yoshlarni ham uchratishingiz mumkin. Shaharda aksariyat aholi ingliz tilida gaplashadi, bu omil esa sayyohlar uchun muloqotni osonlashtiradi.

Dubayga borish uchun arzon mavsumni tanlang

Dubayda dam olish uchun eng qulay oylar: oktyabr, noyabr, mart va aprel oylaridir. Bu vaqtda shahar o‘ta issiq ham, o‘ta sovuq ham emas. Shuning uchun havodan ozor chekmay plyajda dam olishingiz va shaharni aylanishingiz mumkin. Lekin aynan shu oylarda, mehmonxonalar va chiptalar narxlari maksimal darajaga ko‘tariladi.

Agar pulingizni tejashni istasangiz, qishda Dubayga ta’tilga keling: havo harorati nisbatan salqin +24 ° C, suv harorati esa  atigi +20 ° C ga teng bo‘ladi. Suzishni yoqtirmasangiz, qish mavsumi sizga ideal ravishda to‘g‘ri keladi. Qish mavsumi yana ekskursiyalar va xaridlar uchun ham qulay. Agar suzishni istasangiz, qishda basseynga borsangiz bo‘ladi.

Yozda Dubayga bormagan ma’qul. Issiqlik +50 ° C dan yuqori bo‘lib, havo O‘zbekistonning havosiga solishtirganda chilladan ham jaziramaroq bo‘lib tuyulishi mumkin.

Foto: flectone.ru

Dubayga arzon chipta sotib olish mumkinmi?

2024-yilda Dubayga chiptalar narxi: Chiptalar sotiladigan aviasales va O‘zbekiston havo yo‘llarining rasmiy saytida hozirda Dubayga uchadigan to‘g‘ridan-to‘g‘ri biletlarning narxlarini va ma’qul sanalarini tekshirishingiz mumkin. 

O‘zbekistonning bir qancha shaharlaridan Dubayga to‘g‘ridan-to‘g‘ri reyslar mavjud bo‘lib, bu sayyohlar va ishbilarmon sayohatchilar uchun qulayroq imkoniyatlarni taqdim etadi. Aviakompaniyalar Toshkent va Farg‘onadan to‘g‘ridan-to‘g‘ri reyslar taklif etiladi. Toshkentdan Dubayga reyslar har kuni, Farg‘onadan esa payshanba va yakshanba kunlari amalga oshiriladi. Urganch, Buxoro, Termiz, Namangan, Qarshi, Nukus va Samarqand shaharlaridan bog'lovchi (reys almashtirish) reyslari mavjud.

Pulni tejash uchun barcha avia kompaniyalar taklif etayotgan aksiyalarga ham e’tibor qaratish lozim. Masalan, 2024-yilning mart oyida, ya’ni Ramazon oyida “O‘zbekiston havo yo‘llari” Milliy aviakompaniyasi Toshkent — Dubay va Dubay —Toshkent yo‘nalishdagi biletlar narxini pasaytirganini e’lon qildi. 

Aviachiptalar narxi 2024 - yilning mart oyida Toshkent — Dubay, bir tomonga yo‘nalish 1 346 000 so‘mdan, Toshkent — Dubay — Toshkent yo‘nalishi bo‘yicha esa 2 729 000 so‘mdan boshlanadi. Bunday takliflar Dubayga sayohatingizda pulni tejash va raqobatbardosh narxda aviachiptalarni sotib olish uchun ajoyib imkoniyatdir.

2024 - yilning 16-fevralidan O‘zbekiston fuqarolari mamlakatlar o‘rtasidagi kelishuvga ko‘ra Dubay va BAAning boshqa amirliklariga vizasiz borishlari mumkin. Sayyohlar mamlakatda 30 kungacha kirish vizasisiz qolishlari mumkin.

Foto: carposting.ru

Yana shuni yodda tutingki, ilovalarda chiptalar narxi har kuni o‘zgarishi mumkin, misol uchun bir kun chipta narxi 1 400 000 tursa, boshqa kuni 1 350 000 so‘m turishi mumkin. Narxlarni kuzatib borsangiz pulingizni ozgina bo‘lsa ham tejashingiz mumkin. Iloji boricha to‘g‘ridan-to‘g‘ri uchadigan reyslarni tanlagan ma’qul, ular nafaqat qulay, balki nisbatan arzonroq.

Agar qimmat mavsum va bayramlarda uchayotgan bo‘lsangiz, chiptalarni uch yoki to‘rt oy oldin sotib oling. 

Dubayga arzon sayohat sotib olish mumkinmi?

Dubayga sayohat paketlari narxiga odatda parvoz, transferlar, sug‘urta va mehmonxonada turar joy xarajatlari kiradi. Lekin, eng arzon sayohat turlari odatda o‘rta me’yorli mehmonxonalarda va plyajdan uzoqda (5-10 km) turar joyni o‘z ichiga olishini yodda tuting. 

Dengizga yaqinroq mehmonxonalarni o‘z ichiga oladigan sayohat turlari 15-25% qimmatroq.

Agar Birlashgan Arab Amirliklariga borib, faqat plyajda dam olmoqchi bo‘lsangiz, Sharja yoki Ras al-Xayma amirliklarini tanlang. Ular Dubayga qaraganda dam olish uchun arzonroq amirliklardir. 

2024-yil sayohat turlari tur operatorlarning taklifi bo‘yicha bitta katta odam uchun o‘rtacha narx 600 AQSH dollari yoki so‘mda 7,5 million so‘mni tashkil qilmoqda. Agar barcha turoperator saytlarini ko‘rib chiqish va narxlarni solishtirishni istasangiz, so‘nggi daqiqali turlarni arzon narxlarda yoki boshqa byudjet variantlarida topishingiz mumkin.

Lekin shuni yodda tutingki, sayohat operatorlari saytlarida ko‘rsatilgan eng kam narxga chipta va mehmonxona narxlari kiritilmasligi mumkin. 

Agar narxlarni yaxshilab o‘rganib chiqsangiz, sayohat sotib olmasdan o‘zingizni alohida uchishingiz sizga arzonroqqa tushishi mumkin.

Dubayda arzon mehmonxona topsa bo‘ladimi?

Dubaydagi mehmonxonalarni dunyodagi eng qimmat mehmonxonalar desa bo‘ladi: kuniga 4 ming AQSH dollari va undan ham qimmatroq turadigan villa va mehmonxonalar bor.

Dubaydagi eng arzon mehmonxonalar ikki kishi uchun bir kecha 50 AQSH dollarini tashkil qiladi, bir yotoq joyni esa 20 AQSH dollariga topsa bo‘ladi.

Mehmonxonani onlayn bron qilish xizmatlarining ro‘yxatidagi eng yuqori reytingga ega mehmonxonalar odatda 10 ballga ega. Booking.com veb-saytida reytingi 8 yoki undan yuqori bo‘lgan o‘rtacha mehmonxonalarda bir kecha narxi 48 AQSH dollaridan boshlanadi. Bu Dubay uchun yaxshi narx. Biz ushbu toifadagi mehmonxonalarni tanlashni tavsiya qilamiz. 

Dubaydagi arzon restoranlar

Dubay - turli Osiyo mamlakatlari taomlarini tatib ko‘rish uchun ajoyib joy. Yevropacha uslubdagi dabdabali restoranlarning narxlari Osiyo taomlaridan ko‘ra balandroq turadi. Pulingizni tejash uchun chet elliklar uchun muhojirlar tomonidan ochilgan arzon kafe va restoranlarni tanlang.

Birlashgan Arab Amirliklari aholisining 90% Hindiston, Pokiston, Bangladesh, Filippin va boshqa mamlakatlardan kelgan mehnat muhojirlaridir. Ular o‘z vatandoshlari uchun milliy taomlar sotiladigan arzon restoranlarni ochishadi.

Dubayda o‘zimizga tanish lavash ham sotiladi. O‘rtacha bitta lavash narxi taxminan 10 dirham turadi. 

Katta supermarketlarda tayyor ovqat ham sotib olishingiz mumkin: salatlar, go‘sht, shirinliklar va sharbatlar. Ikki kishilik bunday tushlik kuniga 40-50 dirham turadi, lekin shuni yodda tutingki, Dubayda yirik supermarket topish nihoyatda qiyin, ko‘chada ovqatlanish esa noqulay.

Dubay va Deyra hududlarida juda ko‘p arzon kafelar mavjud, shahar markazida va Dubay Marinada arzon kafe va restoranlar deyarli yo‘q.

Nonushtasi bor mehmonxonalarni tanlasangiz, vaqtingizni va pulingizni tejashingiz mumkin.

Foto: travel-picture.ru

Dubayda arzon transport vositalari

Dubayda metro, avtobus, tramvay va suv transporti kabi jamoat transportidan bemalol foydalansa bo‘ladi. Bu arzon va nisbatan qulay variant. Metro orqali shaharning deyarli istalgan hududiga borishingiz mumkin, sayohat narxi 4 dirhamdan boshlanadi, kunlik 20 dirhamga cheklovsiz chipta olishingiz ham mumkin. Dubay metrosi tizimi zamonaviy, texnologik jihatdan rivojlangan, chiroyli va qulaydir. Biroq, shaharning kengligi tufayli sayohatlar uzoq davom etadi, har bir yo‘nalishga o‘rtacha yarim soat davom etadi. 

Plyajlarga metro orqali borishning iloji yo‘q, shuning uchun siz tramvay, avtobus yoki taksidan foydalanishingiz kerak bo‘ladi.

Dubaydagi eng arzon va qiziqarli transport bu Abra. Bu an’anaviy ochiq qayiqlar bo‘lib, Deyra va Bur Dubayni bog‘laydigan Dubay ko‘li bo‘ylab harakatlanadi. Ular arzon (1 dirhamdan) va kuniga 24 soat harakatlanadi. Abralarga naqd pul to‘lashingiz kerak.

Foto: getyourguide.ru

Taksi Dubayda nisbatan arzon: chiqish - 5 dirham, kilometr - 1,7 dirhamdan. Agar siz oilangiz yoki do‘stlaringiz bilan dam olayotgan bo‘lsangiz, taksi buyurish avtobus yoki metroga qaraganda arzonroq bo‘ladi.

Dubayda mashina ijaraga olishdan foyda yo‘q – tirbandlik, benzin, to‘xtash joyi va jarimalar sizga qiyinchilik tug‘dirishi mumkin

Foto: videcam.ru

Dubayda borsa bo‘ladigan bepul joylar

Dubaydagi barcha diqqatga sazovor joylarning narxi asosan qimmat turadi. Lekin biz Dubayda borsa bo‘ladigan bepul qiziqarli joylar ro‘yxatini tuza oldik:

• Dubay savdo markazi.
• Jumeirah masjidi - juma kunidan tashqari har kuni soat 10:00 da ingliz tilida bepul sayohatlarga borsa bo‘ladi.
• Akvarium - kirish to‘lovi bor, lekin akvariumning bir qismini savdo markazi bo‘ylab sayr qilishda ko‘rish mumkin.
• Dubai Mall oldidagi favvoralar.
• Plyajlar - ularning ko‘pchiligi bepul: masalan, Jumeirah Open Beach, Jumeirah Beach Park, Kite Beach va boshqalar.
• Go‘zal Dubay ko‘li.
• Toza va qayta tiklangan Eski shahar.
• Bozorlar: oltin, baliq, ziravorlar bozorlari.
• Dubay Marina va Dubay Lake Towers hududlari.
• Al Fahidiy qal’asidagi Dubay muzeyi - badaviylar va amirlar davrida Dubay qanday bo‘lganini ko‘rsa bo‘ladi.
• Al Qouz hovuzi bog‘i.
• Ras Al-Xor qo‘riqxonasi - ulkan park, ko‘chmanchi qushlar uchun qishlash joyi. Qo‘riqxonaga shanbadan payshanbagacha soat 9:00 dan 16:00 gacha bepul tashrif buyurishingiz mumkin, qushlarni boqish 9:00 dan 9:30 gacha. Kirish bepul.

Akvariumning savdo markazi ichidagi qismi Foto: factroom.ru

Burj Xalifa va boshqa osmono’par binolarning ko'rinishlaridan bepul bahramand bo'lishingiz mumkin. Foto: fotosharm.ru

Xulosa

Quyidagi maslahatlarga amal qilsangiz, Dubayda dam olish arzon va qulay bo‘lishi mumkin:

• Oldindan rejalashtiring: Parvozlar, mehmonxonalar va oziq-ovqat bo‘yicha internetda arzon narxlarni qidiring va oldindan bron qiling.

• Sayohat agentliklari orqali tur sotib olishdan oldin, ularni o‘rganish muhim. Ba’zida umumiy to‘lov narxiga parvozlar hisobga kirmaydi, mehmonxonalar noqulay bo‘lishi yoki qo‘shimcha to‘lovni talab qilishi mumkin. Lekin, agar siz birinchi marta Dubayga uchayotgan bo‘lsangiz, agentlik to‘g‘risidagi sharhlarni o‘rganib, so‘ngra to‘liq sayohat paketini tanlaganingiz yaxshiroq bo‘lishi mumkin. 
• Ortiqcha xarajat qilmaslik uchun ko‘ngilochar joylar va transport narxlarini diqqat bilan o‘rganing.
• Pulni tejash uchun maxsus takliflar va chegirmalardan foydalaning.
• Shahardagi bepul joylarni o‘rganing, masalan, jamoat plyajlari, bog‘lar va attraksionlar. Ularda qo‘shimcha xarajatlarsiz tabiat va shahar atmosferasidan bahramand bo‘lishingiz mumkin.

Bundan tashqari, dam olish uchun mavsumni hisobga olgan holda sayohat vaqtini tanlashingiz kerak. Havo faol dam olish uchun yoqimli bo‘lishi, shuningdek, sayyohlar soni nisbatan kam bo‘lgan davrlarni tanlash maqbuldir.