Janubiy Koreyaga viza olish

Koreyaga viza olish jarayoni

Koreya vizasini olish jarayoni quyidagi bosqichlardan iborat:

1. Koreyaga kirish uchun viza turini tanlash

Avvalo, safaringizning maqsadiga qarab viza turini aniqlashingiz kerak. Koreya uchun mavjud bo‘lgan asosiy vizalar:

2. Zarur hujjatlarni yig‘ish

Vizani olish uchun kerakli hujjatlar viza turiga qarab farq qilishi mumkin. Biroq, asosiy hujjatlar quyidagilarni o‘z ichiga oladi:

• Xalqaro pasport (safardan keyin kamida 6 oy muddatga amal qilishi kerak).
• Viza arizasi (Ariza blankasi Koreya elchixonasi yoki viza markazining rasmiy saytida mavjud).
• Fotosurat (3,5 x 4,5 sm, oq fonda).
• Aviachiptalar bron qilinganligini tasdiqlovchi hujjat (chipta).
• Mehmonxona bron qilish yoki taklifnoma (agar sizni xususiy shaxslar yoki tashkilotlar taklif qilsa).
• Moliyaviy hujjatlar (so‘nggi 3 oylik bank hisoboti, ish joyidan ma’lumotnoma, daromad to‘g‘risidagi hujjat).
• Tibbiy sug‘urta (butun safar davri uchun amal qiladigan).

Qo‘shimcha hujjatlar viza turiga qarab talab qilinishi mumkin, masalan, ish shartnomasi yoki o‘quv muassasasidan rasmiy xat.

3. Elchixonaga yozilish

Hujjatlarni topshirish uchun Koreya elchixonasiga yoki viza markaziga oldindan yozilish zarur. 

4. Hujjatlarni topshirish

Belgilangan kunda hujjatlarning to‘liq to‘plamini elchixonaga olib borishingiz kerak. Hujjatlarning barcha nusxalari va asl nusxalari mavjudligiga ishonch hosil qiling.

5. Viza to‘lovini to‘lash

Vizaga ariza topshirish uchun belgilangan to‘lovni to‘lashingiz kerak bo‘ladi. 

Koreyaga bir martalik viza narxi 30 AQSh dollari, ko‘p martalik viza esa 50 AQSh dollarini tashkil etadi.

6. Viza arizasining ko‘rib chiqilishi

Koreyaga viza arizasi odatda 5-10 ish kuni ichida ko‘rib chiqiladi, ammo bu muddat elchixonaning ish yuklamasiga qarab o‘zgarishi mumkin.

7. Koreya vizasini olish

Agar viza tasdiqlansa, sizga viza beriladi, uni elchixonadan olib ketishingiz kerak. 

Koreya vizasini olishda viza agentliklariga murojaat qilish

Koreyaga borish uchun koʻp turdagi vizalar mavjudligi va har bir viza turi uchun talab qilinadigan hujjatlar roʻyxati turlicha boʻlgani sababli, Koreyaga viza olish jarayonida viza agentliklarining yordami kerak boʻladi. Oʻzbekistonda 14 ta akkreditatsiyadan oʻtgan viza agentliklari faoliyat yuritadi:

Ular diplomatik va nikoh vizalaridan tashqari, maslahatlar, hujjatlar topshirish va vizani olish xizmatlarini taqdim etadi. 2024-yil 15-apreldan boshlab, xizmat haqi 250 ming soʻmni tashkil etadi.

Janubiy Koreyaga viza turlari

Har bir viza turi safarning maqsadiga qarab farqlanadi. Quyida asosiy viza turlari va ularni olish shartlari keltirilgan:

Diplomatik vizalar — A toifasi
Davlat vakillari, diplomatlar va rasmiy delegatsiyalar uchun mo‘ljallangan. Xalqaro loyihalarda ishtirok etuvchi shaxslarga ham beriladi:

• A-1: Diplomatik missiya vakillari uchun
• A-2: Hukumat vakillari va rasmiy delegatsiyalar uchun
• A-3: Xalqaro loyihalarda ishtirok etuvchilar uchun

Turizm va tranzit vizalari — B toifasi
Qisqa muddatli sayohat yoki tranzit maqsadida beriladi. Ayrim davlatlar fuqarolariga vizasiz kirish imkoniyati ham mavjud:

• B-1: Ba’zi davlatlar fuqarolari uchun vizasiz kirish imkoniyati
• B-2: Turizm va tranzit maqsadida qisqa muddatli kirish uchun

Jurnalistika va OAV vizasi — C-1
Jurnalistlar va ommaviy axborot vositalari xodimlari uchun taqdim etiladi, asosan xalqaro yangiliklarni yoritish maqsadida.

Tijorat vizasi — C-2

Tijorat maqsadida safar qilayotganlarga beriladi. Ushbu vizani olish uchun safarning tijorat maqsadida ekanligini tasdiqlovchi hujjatlar, masalan, shartnoma yoki savdo bitimlari talab qilinadi.

Qisqa muddatli vizalar — C-3 va C-4
Qisqa muddatli safar yoki ish faoliyati uchun. Ushbu vizalar 90 kundan oshmagan muddatda foydalaniladi:

• C-3-1: C-3-2 va C-3-6 viza egalaridan tashqari boshqa maqsadlarda kirish vizasi
• C-3-2: Guruhli turizm
• C-3-3: Tibbiy turizm: davolanish maqsadida Koreyaga kelmoqchi bo'lgan chet elliklar
• C-3-4: Turli tadbirkorlik faoliyatlari bilan shug'ullanuvchi shaxslar: bozorni o'rganish, biznes muzokaralari, maslahatlar yoki ARES (sayohat biznes kartasi) kartasi egasi bo'lgan shaxslar
• C-3-5: SERA, ETA (Hindiston, Chili) bitimi bo'yicha Koreya Respublikasiga tashrif buyurmoqchi bo'lgan shaxslar
• C-3-6: Qisqa muddatli biznes: korporatsiyalardan taklif qilingan shaxslar
• C-3-7: Aeroportda kelib tushganda vizani oladigan shaxslar
• C-3-8: Chet ellik (etnik) koreyslar
• C-3-9: Umumiy turizm

90 kundan ortiq bo'lmagan turistik maqsadlar uchun C-3-9 vizasini olish kerak. Qisqa muddatli turistik viza (mamlakatda 90 kungacha bo'lish) uchun konsullik to‘lovi 50 USDni tashkil etadi.

Ta’lim vizalari — D toifasi
Talabalar, o‘qituvchilar va madaniyat hamda san’at sohasidagi shaxslar uchun mo‘ljallangan:

• D-1: Madaniyat va san’at sohasidagi shaxslar uchun
• D-2: Ta'lim olish uchun
• D-4: Ta’lim kurslarida o‘qish uchun (til kurslari, malaka oshirish va boshqalar)

Ish vizalari — E toifasi
Koreyada ishlashni rejalashtirgan mutaxassislar va ishchilar uchun taqdim etiladi:

• E-7: Yuqori malakali mutaxassislar uchun
• E-8: Mavsumiy ishchilar uchun
• E-9: Malakasiz ishchilar uchun
• E-10: Dengiz sohasida ishlovchilar uchun

Oilaviy va doimiy yashash vizalari — F toifasi
Oila a'zolarini ziyorat qilish yoki Koreyada doimiy yashashni istagan shaxslar uchun:

• F-1: Qarindoshlarni ziyorat qilish
• F-2: Doimiy yashash huquqini olish
• F-6: Nikoh orqali doimiy yashash

Boshpana olish vizasi — G toifasi
Koreyada boshpana olishni so‘ragan shaxslar uchun taqdim etiladi.

Koreya turizm vizasining ko‘rinishi. Foto: uleoparda.ru

Qanday hollarda qo‘shimcha hujjatlar talab qilinadi?

Har bir viza turi uchun umumiy hujjatlardan tashqari qo‘shimcha hujjatlar ham talab qilinishi mumkin. Misol uchun:

Qisqa muddatli tashrif vizasi uchun kerakli hujjatlar C-3-1

• Taklifnoma: Tashrifning aniq maqsadini batafsil bayon etilishi kerak.
• Kafolat xati: Taklif qilayotgan shaxs tomonidan beriladi.
• Yashash joyi hujjatlari: Ijara shartnomasi yoki kadastr nusxasi.
• Moliyaviy holatni tasdiqlovchi hujjatlar:
  • Ish joyidan ma'lumotnoma.
  • Daromad haqida ma'lumotnoma.
  • Tadbirkorlik litsenziyasi.
  • So‘nggi 1 yil uchun soliq to‘lovlari haqida hujjat.
• Qarindoshlikni tasdiqlovchi hujjatlar: Oila daftarining nusxasi, nikoh guvohnomasi, tug‘ilganlik to‘g‘risidagi guvohnoma va boshqalar.
• Taklif etilgan shaxsning moliyaviy hujjatlari:
  • Ish joyidan ma'lumotnoma.
  • Oylik maoshi haqida my.gov.uz portalidan olingan ma'lumotnoma yoki bankdan hujjatlar.
  • Ko‘chmas mulk va biznes faoliyatiga oid hujjatlar.
• Qarindoshlik munosabatlari bo‘lmasa: Taklif sababini tushuntiruvchi xat talab qilinadi.

Davolanish vizasi uchun kerakli hujjatlar C-3-3

• Klinikadan bosh shifokor nomidan taklifnoma.
• Kafolat xati va litsenziya nusxasi.
• Xorijiy bemorlarni qabul qilishga litsenziya.
• O‘zbekistondagi klinikadan tashxis va davolanish tarixi haqidagi ma'lumotnoma.
• Koreyadagi klinikada davolanish uchun hujjatlar:
  • Bron yoki qabul qilish hujjatlari.
  • To‘lov kvitansiyalari va boshqa tegishli hujjatlar.
• Moliyaviy holatni tasdiqlovchi hujjatlar:
  • Ish joyidan ma'lumotnoma.
  • my.gov.uz portalidan olingan QR-kodli bank ko‘chirmasi va mulk hujjatlari.

Biznes vizasi uchun kerakli hujjatlar C-3-4

• Koreya kompaniyasidan taklifnoma va kafolat xati.
• Litsenziya nusxasi va firma muhrini tasdiqlovchi hujjat: So‘nggi 3 oy uchun soliq to‘lovlari haqida ma'lumotnoma.
• Koreya kompaniyasining tovar aylanmasi haqidagi hujjatlar: Import-eksport hujjatlari, elektron schyot-fakturalar, kvitansiyalar va mahsulot fotosuratlari.
• O‘zbekiston kompaniyasining litsenziyasi va direktoridan kafolat xati.
• Moliyaviy holatni tasdiqlovchi hujjatlar: Bankdagi mablag‘ harakati, balansdagi qoldiqni tasdiqlovchi hujjatlar.
• Taklif etilgan shaxsning ish joyidan ma'lumotnoma: My.gov.uz portalidan QR-kod bilan olingan.

O‘qish D-2 va til kurslari D-4 vizalari uchun kerakli hujjatlar

Qabul xati: Koreya universiteti yoki til kursidan olingan asl nusxa.

• Til sertifikati: TOPIK yoki IELTS kabi xalqaro tan olingan sertifikat.
• Moliyaviy hujjatlar:
  • Ota-onaning daromadlari haqida ma’lumotnoma.
  • Bankdagi hisob varaqasi yoki bank ma'lumotnomasi.
  • Mulk hujjatlari.
• Tug‘ilganlik guvohnomasi.
• Qabul qiluvchi universitet litsenziyasining nusxasi.
• Eng oxirgi o‘qish joyidan bitiruv hujjati: Asl nusxada, apostil bilan tasdiqlangan.
• Sil kasalligi diagnostikasi: 90 kundan ortiq muddatli vizaga murojaat qilayotganlar uchun talab qilinadi.

Elchixona talab qilinadigan hujjatlar ro‘yxatini va ularni qabul qilish tartibini o‘zgartirishi mumkin. Shu sababli, barcha ma'lumotlarni oldindan elchixonaning rasmiy saytida tekshirib ko‘rish tavsiya etiladi.

Janubiy Koreyaga bilet olish

Oʻzbekistondan Janubiy Koreyaga quyidagi yoʻnalishlar boʻyicha parvoz qilish mumkin:

• Seul
• Pusan
• Cheju
• Tegu
• Chindju
• Kvandju
• Chxondju
• Vondju

Biroq, toʻgʻridan-toʻgʻri reyslar faqat Seul shahriga amalga oshiriladi. Ushbu parvozlar Qanot Sharq, Asiana Airlines va Uzbekistan Airways aviakompaniyalari tomonidan bajariladi. Parvoz davomiyligi taxminan 6 soatni tashkil etadi.

2024-yil oktyabr oyida aviachiptalar narxi 4 million soʻmdan boshlanadi, dekabr oyida esa narxlar 3,2 million soʻmgacha tushadi. Shuning uchun chiptalarni imkon qadar oldindan xarid qilish tavsiya etiladi. Janubiy Koreyaga safar qilish narxlari haqida batafsil ma'lumotni quyidagi maqolamizdan topasiz:

Qo‘shimcha ma'lumotlar

• K-ETA tizimi: 2021-yildan boshlab Koreyaga vizasiz kirishlari mumkin boʻlgan mamlakat fuqarolari uchun K-ETA tizimini joriy etdi, ammo O‘zbekiston fuqarolari uchun Koreyaga kirishda K-ETA talab qilinmaydi.
• Ariza topshirish muddati: 90 kundan ortiq muddatli Koreya vizasi uchun murojaat qilayotganlar tibbiy ko‘rikdan o‘tishlari shart.