Turkiyaga arzon sayohat qilish sirlari

Qachon Turkiyada arzonroq dam olish mumkin?

Turkiyada yilning eng qimmat vaqti — yoz va yangi yil mavsumi hisoblanadi. Bu sayyohlik mavsumi bo'lib, ko'p odam keladi va narxlar yuqori bo'ladi.

• Turkiyada arzonroq dam olish uchun kuz, qish, bahor va iyun oylarida safar qilish kerak. Kurortlarda sokin mavsum sentyabrdan oktyabr oxirigacha davom etadi, bu vaqt oralig’ida dam olish ham yoqimli, ham narxlar pastroq bo'ladi.
• Past mavsumda qimmatroq “besh yulduzli” mehmonxonaga ikki barobar arzonroq tur olish imkoni mavjud.
• Yoz oylarida ba'zida arzon "yonuvchi" turlar ham topiladi. Albatta, bunday tanlov doim ham bo'lavermaydi.

Eng arzon sayohatlarni qanday sotib olinadi?

Avvalo, dolzarb narxlarni ko'rib chiqaylik, so'ngra tejamkorlik bo'yicha maslahatlarga o'tamiz. Uzbekistan Airways aviakompaniyasi tomonidan Turkiyaning Antaliya shahriga O'zbekistonning uchta shahridan to'g'ridan-to'g'ri reyslar amalga oshiriladi. Ular charter ya’ni mavsumiy reyslardir. 24-maydan boshlab Toshkentdan har kuni, Farg'onadan har dushanba va Samarqanddan har payshanba kunlari uchish imkoniyati bor. Shu sababli sayohat agentliklari taqdim etadigan tur paketlari Toshkent, Farg'ona va Samarqand shaharlaridan uchadi.

Bunday tur paketlarni yirik sayyohlik operatorlarining saytlari, masalan, Asialuxe saytining sayohatlar bo‘limi orqali tekshirsangiz bo'ladi.

Toshkent-Antaliya yo'nalishidagi bir haftalik sayohat paketi iyun oyi uchun 1 126 AQSh dollaridan boshlanadi. Bu takliflar yil boshida erta bron qilish asosida chegirmalar bilan sotiladi. "All inclusive" toifasidagi yaxshi 5 yulduzli mehmonxonalarda esa past mavsumda 1 500 AQSh dollaridan, yozda esa 2 000 AQSh dollaridan boshlanadi. Turkiyaning boshqa shaharlariga turlar narxi deyarli bir xil yoki bir oz yuqoriroq ekanligi kuzatiladi.

Pulni tejash va yaxshi dam olish uchun quyidagi qoidalarga amal qilish tavsiya etiladi:

• Eng arzon turlar “yonuvchi” turlar hisoblanadi. Ularni parvozdan 2-7 kun oldin qidirish kerak. Sayohatni parvozdan ikki kun oldin sotib olish tavsiya etiladi, lekin mavsumning avjida bunday qisqa vaqt ichida hamyonbop tur paketlarini topish ehtimoli pastroq bo‘ladi.
• Mehmonxona va tur paketlarini tanlayotganingizda doimo sayyohlarning sharhlariga e'tibor bering. Booking.com saytidagi eng yuqori reytingga ega mehmonxonalar odatda 9 dan 10 ballgacha reytingga ega. Hech bo‘lmasa 8 dan yuqori baho olgan mehmonxonani tanlang. Yomon xodimlar bilan muomala qilishni, hasharotlardan himoyalanishni, eski konditsionerning shovqini ostida uxlashni yoki ikki hafta davomida bitta sochiq bilan artinishni istamaysiz, to‘g‘rimi? Arzon Turkiya mehmonxonalari qancha yulduzli bo‘lmasin, sifatsiz joylarda har xil noxush hodisalar bo‘lishi ehtimoldan holi emas. Shuning uchun, ko‘p yulduzli emas, balki yaxshi reytingga ega mehmonxonalarni tanlang.
• Turlarni onlayn xarid qilishda sayohat paketi narxlarini tur paketlar tanlovlari ko‘rsatilgan tur operatorlarining saytlarida ham, agentliklarning rasmiy saytlarda ham taqqoslab chiqishni tavsiya etamiz.

Eng arzon Turkiya kurortlari

Turkiya kurortlarini narx darajasi:

• Eng qimmat kurortlar: Belek, Fethiye, Bodrum.
• O'rta segment: Side, Marmaris.
• Eng hamyonbop kurortlar: Alanya, Antaliya, Kemer.

Ba'zan dengizdan uzoqroqda joylashgan mehmonxonani tanlash orqali qimmat Turkiya kurortlarida ham arzon dam olish imkoni bor. Mehmonxonaning yaxshi ekanligi va narxi sizni qoniqtirsa, plyajga bepul transfer xizmatlari mavjudligini tekshiring.

Turkiyada kurort bo'lmagan shaharlardagi narxlar hamyonbop darajada bo'ladi. Masalan, Istanbulga sayohat qilish Antaliyaga qaraganda arzonroq bo'lishi ehtimoli yuqori. Bu yerda arzon ovqat va turar joy topish oson, transport narxlari hamyonbop, diqqatga sazovor joylar esa Yevropanikiga qaraganda arzonroq.

Ba'zi kurortlarga arzon turlar sotilsa-da, u yerdagi dam olish har doim ham hamyonbop bo'lavermaydi. Masalan, Kemerda sayyohlar uchun ovqat narxlari yuqori yoki boshqa sabablar. Bu yerda mahalliy aholiga mo'ljallangan ovqatlanish joylari kam uchraydi. Shunday joylarni topish qiyin bo'lsa-da, ular mazali va arzon taomlar taklif qilishadi.

Qanday qilib Turkiyaga arzon chiptalarni sotib olsa bo'ladi?

Turkiyaga sayohat qilish uchun ikki xil variant mavjud: sayohat agentliklari orqali yoki mustaqil ravishda. Odatda, kurort hududlariga uchish sayohat agentliklari orqali amalga oshiriladi. Biroq, kurort bo'lmagan joylar va shaharlarga ko'pincha mustaqil ravishda boriladi. Quyida, Turkiyaga mustaqil ravishda sayohat qilishni rejalashtirayotganlar uchun kerakli ma’lumotlar keltirilgan.

Biletlarni Uzbekistan Airways rasmiy sayti yoki Aviasales kabi biletlarni bron qilish imkoniyatini taqdim etadigan sayt va ilovalardan sotib olish yoki narxlarini tekshirish imkoniyati mavjud. 

Masalan, may oyida Aviasalesda Toshkent-Antaliya yo'nalishidagi eng arzon chipta narxi 3 753 594 so'mni tashkil etadi. Toshkent-Antaliya-Toshkent yo'nalishidagi eng arzon chipta narxi esa 5 991 330 so'm.

Iyun, iyul, avgust va sentyabr oylarida arzon bilet narxlari may oyida tekshirilganda bir tomonga 2 763 068 - 3 120 680 so'mni tashkil qilmoqda. Qaytish bileti bilan esa yozda narxlar 7 million atrofida, sentyabrda esa 8 949 498 so'mni tashkil qilmoqda.

Narxlar har kuni o'zgarib turishini ham e'tiborga olish lozim. Pulni tejash uchun barcha avia kompaniyalari taklif etayotgan aksiyalarga ham e'tibor qaratish zarur.

Foto: aviasales.uz

Agar qimmat mavsumda dam olishni rejalashtirayotgan bo'lsangiz, chiptalarni safardan kamida 2-3 oy oldin xarid qiling. Ammo, mavsumlararo davrda yaqin kunlarda uchish uchun arzon chiptalarni topish maqsadga muvofiq. Lekin bir-ikki hafta oldin olingan biletda qaytish reysi uchun narxlar ancha qimmat bo'lish ehtimoli bor.

Qanday qilib Turkiyada arzon ovqatlanish mumkin?

Agar "all inclusive" (hammasi kiritilgan) tur paketini tanlagan bo'lsangiz, ovqat haqida tashvishlanishingizga hojat yo'q. Ammo mehmonxonadan tashqarida ovqatlanmoqchi bo'lsangiz yoki mustaqil ravishda sayohat qilsangiz, quyidagi maslahatlar sizga yordam beradi.

• Mahalliy aholiga mo'ljallangan joylarda ovqatlaning.

Turklar mazali va arzon ovqatni yaxshi ko'rishadi. Shuning uchun, ular tanlaydigan joylarga e'tibor qarating. Sayyohlar uchun mo'ljallangan ko'chalar va joylardan, shuningdek, rus yoki ingliz tilida sizni chaqiradigan joylarda narxlar bir necha baravar yuqori bo'ladi.

• Istanbulda arzon va mazali ovqatlanish uchun hududlar.

Istanbulda Misr va Grand bozorlar hududida ovqatlaning. Bu joylar nafaqat arzon, balki mazali va o'ziga xos muhitga ega.

• Turk oshxonasiga tashrif buyuring.

Turk oshxonalari "Lokanta" deb ataladi. Bunday oshxonalarda eng arzon narxlar va milliy taomlarning katta tanlovi mavjud.

• Turk shirinliklarini sotib oling.

Turkiyada shirinliklarni kichik qandolatchilik va tamaddi joylaridan sotib oling. Mado va Koska kabi yirik brendlardan uzoqroq turing, chunki ularning narxlari juda yuqori.

• Turk nonushtasini tanlang.

Turkiyada ertalabki nonushta odatda choy, shirinliklar va sendvichlardan iborat bo'ladi. Agar sizga to'yimliroq nonushta kerak bo'lsa, mercimek chorbasi (loviya sho'rva) va omlet tanlang, ular bilan birga ko'p non ham beriladi.

Sayyohlarning sharhlariga ko'ra Turkiyada ovqatlanishning o'rtacha narxlari:

• Istanbulda o'rtacha tushlik cheki ikki kishiga 12 AQSh dollarini, Kemerda esa 15 AQSh dollarini tashkil qilgan.
• Istanbulda 10 kunlik kafelarda ovqatlanish, shirinliklar, mahsulotlar, mevalar va sharbatlarga sarflagan umumiy xarajat ikki kishiga 230 AQSh dollarini, Kemerda 6 kunlik xarajat esa 180 AQSh dollarini tashkil qilgan.

Ekskursiyalar

Ekskursiyalarni sotib olishning bir necha usullari mavjud, har birining o'z afzalliklari va kamchiliklari bor. Mehmonxona xodimlari va sayohat agentliklari tomonidan tashkil etilgan ekskursiyalar qulay va xavfsiz bo'lsa-da, narxi yuqoriroq bo'ladi.

Mahalliy agentliklar ekskursiyalarni arzonroq narxlarda taklif qilishadi, bu byudjetingizni tejashga yordam beradi. Masalan, jeep yoki kvadrotsikl safarlari kamroq odam bilan amalga oshiriladi va diqqatga sazovor joylarga ko'proq e'tibor qaratiladi. Mahalliy agentliklar ob-havo yomonlashsa yoki sog'ligingiz yomonlashsa, ekskursiyani keyingi kunga ko'chirish imkoniyatini ham taklif qilishadi. Biroq, bunday tashkilotlarda ba'zi muammolar, masalan, xavfli yo'llarda haydovchi yo'qligi yoki ekskursiyaning past sifati kabi holatlar yuzaga kelishi ehtimoldan holi emas.

Foto: tripster.ru

Ekskursiyalarni narxlarni solishtirgandan va sayyohlar sharhini o'rganganingizdan so'nggina sotib oling. Sharhlarni getyourguide.com kabi ommaviy saytlarda yoki Yandex va Google xaritalarda ko'rish mumkin. 

Turkiyaga sayohat qilganda ko'plab ko'ngilochar tadbirlar va ekskursiyalarni mustaqil ravishda tashkil qilish yaxshiroq. Bunga Turkiyaning Efes, Demre, Perge va Troya shaharlariga sayohatlar kiradi. Mustaqil sayohat qilish orqali qayerga borishni o'zingiz hal qilasiz va ko'proq vaqt tejaysiz.

Ekskursiyalar bo'yicha yana bir-nechta foydali maslahatlar:

• Guruhli ekskursiyalardan voz kechgan ma'qul.

Barcha qiziqarli joylarni mustaqil ravishda ziyorat qilish qulayroq va bir necha baravar arzonroqqa tushadi. Deyarli har qanday diqqatga sazovor joyga jamoat transportida yoki piyoda yetib borishingiz, barcha ma'lumotlarni esa internet, stendlar yoki bukletlardan olishingiz mumkin.

• O'zingiz ekskursiyaga bormoqchi bo'lsangiz Istanbulda “Museum Pass Istanbul” kartasini sotib oling.

Bu karta bilan shahardagi barcha asosiy diqqatga sazovor joylarni biroz arzonroq va navbatsiz ziyorat qilish imkoniyatiga ega bo'lasiz. Transport xarajatlarini tejash uchun Istanbulkart sotib oling.

• Turkiyada avtomobil ijaraga oling.

Turkiyada avtomobilda istalgan qiziqarli joylarga osonlikcha yetib borishingiz va go'zal qirg'oq bo'ylab sayohat qilishingiz mumkin. Mahalliy firmalarda kunlik avtomobil ijarasi 40$ dan boshlanadi, lekin Localrent.com saytida arzonroq variantlarni topish mumkin. Past mavsumda narxlar biroz pasayadi. Bu, albatta, tur operatorlari taklif qiladigan ekskursiyalardan arzonroqqa tushadi.

Xulosa

Turkiyada tejamkor dam olish uchun to‘g‘ri vaqtni tanlash, oldindan tur va mehmonxonalarni bron qilish, mahalliy ovqatlanish joylariga e’tibor qaratish va ekskursiyalarni mustaqil tashkil qilish kabi usullar mavjud. Ushbu tavsiyalarni hisobga olib, safaringizni oldindan rejalashtirish orqali xarajatlarni sezilarli darajada kamaytsa bo‘ladi.

Mamlakat ichida harakatlanish uchun Turkiyaning yirik shaharlarda metro, tramvay va avtobuslardan foydalanish yoki Istanbulda IstanbulKart kabi transport kartalarini xarid qilish juda qulay. Agar mustaqil ravishda sayohat qilishni rejalashtirayotgan bo‘lsangiz, Turkiyada avtomobil ijarasi yaxshi tanlovdir. Bu orqali Turkiyaning eng go‘zal va kam tanilgan joylariga o‘zingiz tashrif buyurishingizga yo‘l ochiladi.

Xulosa qilib aytganda, Turkiyada arzon va maroqli dam olish uchun bu tavsiyalarni inobatga olib, safaringizni oldindan rejalashtiring