O‘zbekistonliklar Hamster Kombat o‘yinidan qancha daromad qilishdi?

Referal dasturi yetakchilari va yirik kalit egalariga ko‘proq tokenlar berildi, oddiy o‘yinchilar esa 1000 dan 3000 gacha token olishdi, bu premarket narxiga ko‘ra 9-27 dollarni tashkil etadi. Agar listingda HMSTR tokenining narxi ikki baravarga oshsa ham, o‘yinchilarning o‘rtacha daromadi 18-54 dollar atrofida bo‘ladi. 

Tokenlar qanday hisoblandi?

HMSTR tokenlari quyidagicha taqsimlandi:

• Har bir million passiv daromad uchun — 200 HMSTR;
• Har bir taklif qilingan doʻst uchun — 5 HMSTR;
• Har qanday usulda topilgan har bir kalit uchun — 5 HMSTR;
• Vazifalarni bajarish uchun — juda kam miqdor;
• Yutuqlar uchun — olish qiyinligiga qarab turli miqdor.

O‘yin yaratuvchilari 131 million o‘yinchi token tarqatilganini aytishdi, lekin 2,3 million o‘yinchi firibgarlik tufayli «airdop»dan chetlatildi. Shuningdek, 30,6 million o‘yinchi hali tokenlarni chiqarib olmagan, lekin hozirda chiqarib olish imkoniyatiga ega.

Umumiy token ishlab chiqarilishi 100 milliardni tashkil etadi. Shundan 75% o‘yinchilarga ajratiladi, lekin 26-sentyabrda bo'lib o'tadigan «airdop»da faqat 60% taqsimlanadi. O‘yinchilar tokenlarning 88,75%ini darhol olishadi, qolgan 11,25% esa listingdan 10 oy o‘tgach ochiladi.

Bunday hisob-kitoblar ko‘pchilik uchun qoniqarsiz bo‘ldi. Ijtimoiy tarmoqlarda foydalanuvchilar Hamster Kombatni «Skamster* Kombat» deb atay boshlashdi. Aslida, boshqa natijani kutish qiyin edi, chunki hech kim har bir foydalanuvchi katta daromad olishini kafolatlamagan. 

Hamster Kombat O‘zbekistonliklar orasida tez tarqaldi. Xomyakni "tap" qilayotgan odamlarni kafelarda, ko‘chalarda, jamoat transportida, qisqasi, deyarli har yerda uchratish mumkin edi. Xomyakning ommalashishiga avvalgi Notcoin o‘yini ham ta’sir ko‘rsatdi. U O‘zbekistonda unchalik katta shov-shuvga sabab bo‘lmagan bo‘lsa-da, ko‘pchilik undan hech bo‘lmaganda biroz daromad qilishga muvaffaq bo‘lgan.

*Skam — bu firibgarlik yoki aldov turi bo‘lib, asosan internetda keng tarqalgan.

Kelajakda nima bo‘ladi?

26-sentyabr kuni tokenlarning listingi bo‘lib o‘tadi. Ko‘pchilik tokenlarini chiqarib olishga tayyorlanmoqda, bu esa narxning pasayishiga olib kelishi mumkin. Ishlab chiqaruvchilar o‘yinning 2-mavsumi davomida qo‘shimcha 15% token taqsimlanishini aytishdi. Biroq qolgan tokenlarni qachon chiqarib olish mumkinligi hozircha noma'lum.