Hamster Kombat tokenlarning 60 foizini o'yinchilarga ajratmoqchi

2024-yilning 30-iyun kuni Hamster Kombat loyiha jamoasi muhim xabarni e'lon qildi, ushbu xabar quyidagi asosiy yangiliklarni o'z ichiga oladi:

• Yangilangan yo'l xaritasi va Whitepaper hujjatlari e'lon qilindi. Hujjatlar Hamster ekotizimi bo'yicha rejalarning batafsil bayonini o'z ichiga oladi. Hujjatlarda Hamster Kombat jamoasi, har bir o'yinchining umumiy muvaffaqiyatga qo'shgan hissasini tan olib, 60% tokenlarni hamjamiyatga taqsimlashga qaror qilgani ko'rsatilgan. Bu qaror blokcheyn dunyosida ilk texnik jihatdan murakkab bo'lgan tokenlarni taqsimlash jarayonini o'z ichiga oladi. Aniq sanalarni belgilash imkonsiz bo'lganligi sababli, ushbu jarayonni iloji boricha xatoliklarsiz va uzluksiz amalga oshirish uchun TON ekotizimi bilan yaqindan hamkorlik qilishi ta’kidlangan.
• Hamster Kombat Whitepaper hujjatida keltirilgan ma'lumotlarga ko'ra, umumiy tokenlarning qolgan 40% likvidlikni ta'minlash, ekotizim bilan hamkorliklar, grantlar, mukofotlar va boshqa maqsadlar uchun ajratiladi. Ushbu hujjatda o'yin auditoriyasi 190 mamlakatda 300 million foydalanuvchiga yetgani, shulardan 50 millioni har kuni faol ekani ta'kidlangan. Jamoa, shuningdek, o'yin allaqachon foydali bo'lganligini va tokenlarni sotishga zarurat yo'qligini bildirdi.

Hamster Kombat jamoasi, bu loyiha faqat boshlanishi ekanligini va Hamster ekotizimini yaratishda ilk qadam ekanligini ma'lum qildi. Ushbu ekotizim kelgusida o'yin doirasidan tashqariga chiqishni rejalashtirmoqda. 

Notcoin, Hamster Kombat va boshqa shunga o'xshash loyihalar tufayli Telegram messenjeri foydalanuvchilari soni oylik 950 milliondan oshdi. Avvalroq telegram asoschisi Pavel Durov esa Hamster tokenining TON blokcheynida chiqarilishini e'lon qilib, loyihani qo'llab-quvvatlagan. Bybit birjasi esa HMSTR tokenining premarket savdosini ochgan.