Tishga breket qo'yish qancha turadi?

Breket o'rnatishga tayyorgarlik

Breket o'rnatishga tayyorgarlik qilishda ortodontik davolanishni boshlashdan oldin quyidagilarni bajarish zarur:

Kariesni davolash. Tishlarda karies bo'lsa, uni davolash kerak. Buni istalgan stomatologik klinikada amalga oshirish mumkin. 

Kariesni davolash murakkabligiga qarab narx 50 ming so'mdan 830 ming so'mgacha turadi.

Ortodont tanlash. Yaxshi natijaga erishish uchun kamida uchta mutaxassis bilan maslahatlashish tavsiya etiladi. Turli shifokorlarda va klinikalarda davolashning narxi va rejasi turlicha bo'lishi mumkin. 

Ortodontning boshlang'ich maslahati 30 ming so'mdan boshlanadi, lekin ba'zi klinikalarda bu maslahat bepul bo'lishi ham mumkin.

Ortodont shifokor qabuli narxi. Foto: med24.uz

Jag'ning panoramasi. Jag'ning panoramasi (ortopantomogramma)ni, ortodontga tashrif buyurishdan oldin olish zarur, lekin uni ko'pincha klinikaning o'zida ham amalga oshirish mumkin. Bu surat davolanish jarayonida kerak bo'ladi.

Jag' suratining narxi 170 ming so'mdan 300 ming so'mgacha turadi.

Jag' surati. Foto: 34580011.ru

Tishlarni olib tashlash. Breket o'rnatishdan oldin, ba'zi tishlarni olib tashlash kerak bo'lishi mumkin. Ko'pincha, aql tishlarini olib tashlash tavsiya etiladi. 

Tishlarni olib tashlash narxlari oddiy yoki murakkab olib tashlash va klinika turiga qarab 50 ming so'mdan 605 ming so'mgacha turadi.

Jag'dan quyma olish. Quyma tish qatori nuqsonini to'g'rilash uchun zarur bo'lgan kuchni aniq tanlash va tish qoplamasi yoki ko'prikning modelini maksimal darajada to'g'ri tayyorlash imkonini beradi. Slepka quyidagilarni o'z ichiga oladi: maxsus materialda tishlar, suyaklar va yumshoq to'qimalarning aniq tasviri. 

Jag'dan quyma olish narxining o'rtacha narxi: 200 ming, ba’zi klinikalarda umumiy davolash narxiga kiritilgan bo'lishi mumkin.

Tishlarni tozalash. Breket o'rnatishdan oldin tishlarni professional tozalash kerak, chunki breketlar toza emalda yaxshi saqlanadi.

Tishlarni parodontik tozalash narxi 5 ming so'mdan 200 ming so'mgacha turadi. 

Breketlarning materialga ko'ra turlari 

Breketlar metall, keramika, sapfir va plastik turlariga bo'linadi.

Breket tizimining narxi ishlab chiqaruvchi, klinika va shifokorga bog'liq. Hozirgi kunda to'lov asosan davolash va natija uchun umumiy holda amalga oshiriladi  shuning uchun "material uchun to'lash" degan tushuncha yo'q. Quyida taxminiy narxlar keltirilgan, aniq ma'lumotni stomatologiyada bilib olish tavsiya etiladi.

Metall breketlar

Metall breketlar tibbiy po'latdan — xrom va nikel qotishmasidan yoki titan va nikel qotishmasidan tayyorlanadi. Ular eng samarali hisoblanadi: tishlarni tezroq harakatga keltiradi. Metall breketni bekatib qolgan bo'lsa qaytadan yopishtirish mumkin. Boshqa materiallardan tayyorlangan breketlar bilan bu mumkin emas: birinchi-ikkinchi martadan keyin yangi yopishtirishga to'g'ri keladi.

Biroq, metall breketlar tishlarda juda aniq ko'rinib turadi, shuning uchun ko'pchilik ularni taqishdan uyalishadi. Shuningdek, arzon metall breketlar sifatsiz bo'lishi mumkin, ayniqsa ular ikki qismdan iborat bo'lsa va payvandlashda xatolik qilingan bo'lsa — duga shunday holatlarda yomon suriladi. Qimmatroq metall breketlar, ehtimol, mustahkam tuzilma va aniq quyishga ega bo'ladi.

Metall breket ko'rinishi. Foto: zubnaya-klinika24.ru

Metall breketlarning yana bir turi — titan breketlar. Ular nikelga allergik reaksiyasi bo'lgan odamlarga o'rnatiladi. 

Metall breketlarning o'rtacha narxi: 6-8 million.

Keramik breketlar

Keramika breketlar tish emalining rangiga mos keladi, shuning uchun deyarli ko'rinmaydi. Lekin ularni metall breketlarga qaraganda uzoqroq taqish kerak bo'ladi va ular qimmatroq turadi.

Keramik breket ko'rinishi. Foto: primesmile.ru

Shuningdek, keramik breketlar ko'pincha rangini o'zgartiradi. Shifokorlar lavlagi, karri, qizil sharob, qahva va quyuq qora choy iste'mol qilmaslikni tavsiya etadilar, shunda breketlar rangini o'zgartirmaydi.

Odatda keramika breketlar faqat bir nechta tishni to'g'rilash uchun, ya’ni kichik tuzatish ishlarini bajarish uchun tanlanadi. Murakkab holatlar uchun metall breketlardan foydalanish ma'qul. 

Keramik breketlarning o'rtacha narxi: 8-14 million.

Sapfir breketlar

Sapfir breket ko'rinishi. Foto: primesmile.ru

Sapfir breketlar sun'iy kristaldan tayyorlanadi. Ular to'liq shaffof va eng qimmat breketlardir. Ham sapfir, ham keramika breketlar metall breketlarga qaraganda mo'rtroq, ovqat paytida ko'proq sinib yoki uzilib qoladi.

Sapfir breketlarning o'rtacha narxi: 12-14 million.

Plastik breketlar

Plastik breketlar odatda yarim shaffof poliuretandan tayyorlanadi. Ular tishlarda sezilmaydi, shilliq qavatni tirnamaydi. Kamchiliklari — rangini o'zgartiradi va oson sinadi.

Plastik breket ko'rinishi. Foto: dr-lopatin.ru

Jiddiy tish patologiyalarida, odatda, plastik breketlardan foydalanilmaydi, chunki material mo'rt. Ammo tish qatorini oddiy tuzatish uchun ular mos keladi va ko'pincha metall bilan kombinatsiyalangan holatda qo'llaniladi. Bunday breketlar hamma klinikalarda ham mavjud emas.

Plastik breketlarning o'rtacha narxi: 12 million.

Breketlarning o'rnatilish usuliga ko'ra turlari 

Breketlar o'rnatish usuliga ko'ra ligaturali va o'z-o'zidan ligaturalanuvchi turlarga bo'linadi.

Ligatura – ortodontik tizim bo'lib, ular sim lentalar yordamida o'rnatiladi. Konstruktsiya o'rnatilganda, uning qismlari tishlarni jag'da kerakli yo'nalishda harakatlantirish uchun tanlanadi.

Ligaturali breketlar

Ligaturali breketlarda sim maxsus ligatura — metall yupqa sim yoki silikon rezinka yordamida mahkamlanadi. Ligaturalı breketlarni ishlatganda har oyda bir marta shifokorga tashrif buyurish kerak bo'ladi, chunki ligaturaning simga ta'siri doimiy nazoratda bo'lishi kerak. Bu minus emas, balki tishlarning to'g'ri harakatlanishiga kafolatdir. Har safar simni almashtirgandan so'ng, ligatura, ayniqsa metall bo'lsa, og'iz bo'shlig'ini qirib yuborishi mumkin. Shuningdek, shifokor simning taranglik darajasini o'zgartirganda, ba'zida og'riqli hislar paydo bo'lishi mumkin. Odatda moslashish uchun 1—3 kun kerak bo'ladi.

Agar ligaturalar milk va og'iz bo'shlig'ini qattiq jarohatlashtirsa, ortodontlar maxsus mumdan foydalanishni tavsiya etishadi: bu mum yordamida ligaturalarni qirib yuboradigan joylarga surish kerak bo'ladi.

O'z-o'zidan ligaturalanuvchi breketlar

O'z-o'zidan ligaturalanuvchi breketlar esa breketning tuzilishi bilan farq qiladi: ular kichik qulflar yoki klipslarga o'xshaydi. Sim breketning yiviga joylashtirilib, mahkamlanadi. Simni mahkamlash uchun qo'shimcha elementlar kerak emas, shuning uchun konstruksiya ancha ixcham ko'rinishga ega bo'ladi. O'z-o'zidan ligaturalanuvchi breketlar yordamida davolanishda shifokorga odatda kamroq, 8—10 haftada bir marta tashrif buyuriladi.

Murakkab holatlarda ortodont bunday breketlardan voz kechishi va ligaturali breketlardan foydalanishni tavsiya qilishi mumkin, chunki bu tishlarning eng kichik harakatlarini ham nazorat qilish va tuzatish imkonini beradi.

Odatda, o'z-o'zidan ligaturalanuvchi tizim ligaturali tizimdan qimmatroq turadi — o'rtacha narx: 8-12 million so'm bo'lib, bu narx metall breketlar uchun bir jag'ga hisoblangan.

Breketlarning o'rnatilish joyiga ko'ra turlari

O'rnatilish joyiga ko'ra breketlar vestibulyar va lingval turlarga bo'linadi.

Vestibulyar breketlar

Vestibulyar breketlar tishlarning old yuzasiga o'rnatiladi. Bu klassik va eng ko'p qo'llaniladigan breket tizimi hisoblanadi. Vestibulyar breketlarning yagona kamchiligi — ular tishlarda ko'rinib turadi. Biroq, ular arzonroq bo'lib, shifokorlar ular bilan ishlashni oson deb bilishadi.

Lingval va Vestibulyar breketlar.

Lingval breketlar

Lingval breketlar tishlarning orqa yuzasiga o'rnatiladi, shuning uchun ular tashqaridan ko'rinmaydi. Dastlab, lingval breketlar tilga noqulaylik tug'dirishi mumkin: til uchun joy kamroq bo'lib, bu so'lakning ko'payishiga olib keladi. Natijada bemorlar ba'zida shivirlab gapirishga o'tadilar. Biroq, tish yoyining kengayishi bilan bu muammo o'z-o'zidan hal bo'ladi. Lingval breketlar bilan og'iz bo'shlig'ining gigiyenasini ta'minlash biroz qiyinroq. Shuningdek, agar tishlar kichik bo'lsa, bu breketlar gingivit — milkning yallig'lanishiga sabab bo'lishi mumkin. Umuman olganda, lingval breketlar kattaroq tishlar va tishlarning kamroq qiyshaygan holatlari uchun yaxshiroq mos keladi.

Ortodontga tashrif qanday o'tadi?

Breket tizimi o'rnatilgandan so'ng, har oyda ortodontga rejalashtirilgan qabulga borish talab etiladi. Shifokor davolanish jarayonini kuzatadi, simlarga tortish kuchini oshirish yoki ularni almashtirish kabi amallarni bajaradi. Masalan, yanada qattiqroq simni o'rnatish mumkin.

Ortodontning rejalashtirilgan qabulining o'rtacha narxi 100 ming so'm, lekin aniq narx shaharga, klinikaga va shifokorga bog'liq. Davolanish jarayonida ba'zan qo'shimcha muolajalar va apparatlar kerak bo'lishi mumkin. Misol uchun:

• Yuqori va pastki jag'ni birlashtiradigan elastik rezinalarni taqish — bu eng keng tarqalgan qo'shimcha muolaja bo'lib, breket taqqanlarning deyarli barchasida qo'llaniladi.
• Tishlarni bir-biridan itarish yoki ularni tezroq siljitishga yordam beradigan prujina o'rnatish.
• Gerbst apparatini o'rnatish — bu distal tishlashning murakkab shakllarini davolash uchun ishlatiladigan olinmaydigan konstruktsiya.

Bu qo'shimchalar tufayli davolanishning yakuniy narxi dastlabki narxdan sezilarli darajada farq qilishi mumkin. Misol uchun, barcha xarajatlarga qo'shimcha sifatida prujina o'rnatish va rezinalarni taqish talab qilinadi.

Rejasiz tashriflar

Breket taqqan bemorlar ba'zida rejasiz ortodontga murojaat qilishlari zarur bo'ladi. Masalan, qattiq narsani noto'g'ri tishlash natijasida simni mahkamlaydigan qulf tishdan tushib ketishi mumkin. Bunday holatlarda, shifokorga zudlik bilan murojaat qilish tavsiya etiladi.

Bu breket taqqan bemorlar uchun keng tarqalgan muammo sanaladi. Masalan, eng ko'p buziladigan qulfni almashtirishning o'rtacha narxi 100-150 ming so'mni tashkil qiladi.

Kapalar va reteynerlar

Breketlarni olib tashlagandan so'ng, tishlarning holati yana o'zgarmasligi uchun tishlashni mustahkamlash muhimdir. Buning uchun ortodontlar retension kapalar yoki reteynerlardan foydalanadilar.

Retension kapalar

Retension kapalar — bemorning tishlariga moslab yasalgan olinadigan plastik moslamalar. Ularni hayot davomida har kecha taqib yurish tavsiya etiladi. Agar kapalar bir muddat taqqandan so'ng yoqimsiz hidlana boshlasa, ularni maxsus ko'pikli tabletkalar yordamida tozalash mumkin. Bunday tabletkalarni har qanday dorixonada topish mumkin. Yoki har kuni ertalab bu tabletkalardan foydalanib, yoqimsiz hidning paydo bo'lishiga yo'l qo'ymaslik mumkin.

Retension kapalarning o'rtacha narxi: bir jag' uchun 200 ming so'm.

Yechilmaydigan reteynerlar

Tishlash shaklini saqlash uchun yana bir usul — yechilmaydigan reteyner, ya'ni tishlarning ichki yuzasiga yopishtiriladigan maxsus ortodontik shina. Qaysi usulni tanlashni shifokor hal qiladi. 

 Yechilmaydigan reteynerlarning o'rtacha narxi: bir jag' uchun 100 ming so'm.

Breketlarning yakuniy narxi qancha?

Breketlar narxi ularning turiga, shaharga, klinikaga va davolanishni to'liq yoki bosqichma-bosqich to'lashingizga bog'liq. Odatda, bosqichma-bosqich to'lashda umumiy summa biroz yuqori bo'ladi, chunki klinikaga to'liq summani oldindan olish foydaliroq. Lekin Toshkent bo'yicha o'rtacha narxlar quyidagicha:

• Kariesni davolash murakkabligiga qarab narx 50 ming so'mdan 830 ming so'mgacha turadi.
• Birinchi maslahat: 30-150 ming so'm
• Tishlarni olib tashlash narxlari oddiy yoki murakkab olib tashlash va klinika turiga qarab 50 ming so'mdan 605 ming so'mgacha turadi.
• Ortopantomogramma (jag' surati): 170 ming so'mdan 300 ming so'mgacha turadi.
• Jag'dan quyma olish narxining o'rtacha narxi: 200 ming.
• Metall breketlar: 6-8 million.
• Keramik breketlar: 8-14 million.
• Sapfir breketlar: 12-14 million.
• Ortodontga tashriflar: har bir tashrif uchun 100 ming so'm
• Kapalar: bir jag' uchun 200 ming so'm.
• Reteynerlar: bir jag' uchun 100 ming so'm.
• Breketlardagi buzilgan qulfini almashtirish: 100-150 ming so'm.
• Rezinka kabi sarf materiallari: 60 ming so'm.

Yuqoridagi ma'lumotlar davolanish xarajatlarini tushunishga yordam beradi va kelajakdagi xarajatlar uchun reja tuzishda foydali bo'lishi mumkin.