Yo‘l harakati qoidalari jarimasini qanday bekor qilish mumkin?

Shikoyat yuborish xizmatidan onlayn foydalanish tartibi

Shikoyatni yuborish uchun my.gov.uz saytidagi maxsus xizmatdan foydalanishingiz kerak. 

Jarima yuzasidan yuborilgan elektron shikoyatlar 10 ish kuni ichida ko‘rib chiqiladi. Shikoyat yuborishda hech qanday qo‘shimcha hujjatlar talab etilmaydi. Saytda ko‘rsatilgan ma'lumotlarga ko‘ra, shaklni to‘ldirish o‘rtacha 9 daqiqa vaqt oladi, ya'ni jarayon tez amalga oshiriladi. Shikoyat davrida jarimani tezroq to‘lash uchun taqdim etilgan chegirmalar amal qilishda davom etadi.

Xizmat nomi: “Yo'l harakati qoidalarini buzganlik uchun jarima yuzasidan shikoyat qilish”.

• Birinchi bosqichda oferta taqdim etiladi, shartlar bilan rozi ekanligingizni tasdiqlashingiz lozim.

• Ikkinchi bosqichda avtomobil, qoida buzilgan hududni va qaror raqamini kiritish talab etiladi. 

Shundan so‘ng, uchta shikoyat sababidan birini tanlash kerak:

• "To‘lov summasi ko‘rinmagan";
• "Yashash manziliga jarima qarori kelmadi";
• "Qaror noto‘g‘ri shakllangan".

Shuningdek, "Boshqa" bandini tanlab, muammoni “Murojaat mazmuni” darchasida batafsil tushuntirish imkoniyati ham mavjud.

• So‘nggi bosqichda, shikoyatingizni yuborishingiz kerak. 

Agar shikoyat qanoatlantirilsa, Yo‘l harakati xavfsizligi xizmati (YHXX) O‘zbekiston Respublikasi Ma'muriy javobgarlik to‘g‘risidagi kodeksning 271-moddasiga binoan ma'muriy ishni to‘xtatadi. Natijada jarima va boshqa sanksiyalar bekor qilinadi.

Jarimani YHXX idorasiga borib bekor qilish

Tez yordam, yong‘in xizmati yoki ichki ishlar organlariga yo‘l berganingizda, avtomatik kameralar sizni qoidabuzar sifatida qayd qilishi mumkin. Bunday holatda, inson ishtirokisiz jarayon amalga oshirilganligi sababli, protokol tuzilmaydi. Shuning uchun jarima haqida xabar bermasangiz, uni bekor qilish jarayoni boshlanmaydi.

Foto: autostrada.uz

Jarimani bekor qilish uchun Yo‘l harakati xavfsizligini boshqarish tizimi xodimlariga murojaat qilishingiz kerak.

Misol uchun, Toshkentda ularning ofisi Yakkasaroy tumani, Glinka ko‘chasida joylashgan (sobiq GAI binosi). Murojaat qilganingizda, qoidabuzarlik sodir bo‘lgan vaqt, joy va maxsus transport vositasiga yo‘l berganingizni tushuntiring. Agar jarima xati mavjud bo‘lsa, uni ham ko‘rsatishingiz mumkin. Xodimlar sizning holatingizni tekshirib, zarurat holatini isbotlaganingizda, jarimani bekor qilishadi. Bu jarayonni qoidabuzarlik sodir bo‘lgan kundan boshlab yetti kun ichida amalga oshirganingiz ma’qul, chunki kameralar yozuvlarni bir hafta davomida saqlaydi. Agar yetti kunlik muddat o‘tib ketsa, jarimani faqat maxsus transport vositasi siz bilan birga fotosuratga tushgan holatda bekor qilish mumkin.

Bu jarayon ko‘p vaqt olmaydi — yo‘lga ketgan vaqtni hisobga olmasangiz, jarayon ofisda taxminan 10 daqiqa ichida hal bo‘ladi. Shaxsan jarimani bekor qilish haqiqiy qoidabuzarlik uchun jarima to‘lashdan ko‘ra qulayroq. Chunki, O‘zbekiston Respublikasi Ma’muriy javobgarlik to‘g‘risidagi kodeksining 128-5-moddasiga ko‘ra, maxsus transport vositalariga yo‘l bermagan haydovchilar 5 baravar bazaviy hisoblash miqdorida jarimaga tortiladi. 

Agar bir yil ichida ushbu qoidani qayta buzsangiz, jarima miqdori 20 baravarga oshishi yoki haydovchilik huquqidan bir yilga mahrum bo‘lish xavfi bor.