O'zbekiston fuqarolari uchun AQSh vizasini olish

AQSh vizasini olish uchun O'zbekiston fuqarolariga kerakli hujjatlar:

Talab etiladigan hujjatlar viza turiga qarab o‘zgarishi mumkin, lekin ularning asosiy ro‘yxati quyidagicha:

Viza uchun DS-160 shaklidagi anketa 

Anketani saytda elektron shaklda ingliz tilida to‘ldirish kerak. DS-160 shaklidagi ariza murojaatning eng muhim qismi desa bo‘ladi. Suhbat o‘tkazadigan konsul anketadagi ma’lumotlarga asoslanadi. Shaklni arizachi o‘zi to‘ldirishi kerak. Bu bir kundan ko‘proq vaqtni olishi mumkin. Anketada ijtimoiy holat, sayohat tarixi, qonun bilan munosabatlar haqida savollar mavjud. Erkaklar uchun so‘rovnomada harbiy xizmat bilan bog‘liq bo‘lgan bir nechta qo‘shimcha bo‘limlar ham bo‘lishi mumkin. 

Oldindan bilish kerak bo‘lgan jihatlardan biri shundaki, anketada arizachi ijtimoiy tarmoqlardago sahifalarining havolalarni taqdim etishi kerak. Avval viza olganlarning tavsiyasiga ko‘ra AQSh vizasi berilgunga qadar chipta yoki turar joyni bron qilish kerak emas. Anketada bularning hech biri ko‘rsatilmaydi. Anketani to‘ldirgandan va topshirgandan so‘ng, arizachi tasdiqlash sahifasiga yo‘naltiriladi. So‘ngra, arizachi bu sahifani chop etishi va suhbatga o‘zi bilan olib borishi kerak. Unda shtrix-kod aniq chop etilgan bo‘lishi kerak. 

Viza uchun fotosurat

Viza uchun fotosuratlar jpeg shaklida saytga onlayn yuklanadi. Pasportdagi kabi ikkita fotosurat taqdim etilishi kerak. Elektron holatda 600x600 dan 1200x1200 pikselgacha bo‘lishi va hajmi 240 kb.dan oshmasligi kerak. Surat 6 oy ichida olingan bo‘lishi kerak. Rasmlar rangli bo‘lishi kerak. Surat ko‘zoynaksiz va oq fonda olinishi kerak. Yuz tasvirning 50-69% ni egallashi kerak. Faqat asil fotosuratlar qabul qilinadi, har qanday o‘zgartirilgan fotosuratlar (nusxalar, skanerlar, fotoshop va boshqalar) mos kelmaydi.

Viza uchun olingan fotosuratda yuz taxminan shunday joylashgan bo‘lishi kerak. Foto: travel.yandex.ru. Muallif: Anna Skvortsova

Pasport

Amaldagi xorijga chiqish biometrik pasporti. Pasport muddatining safar boshidan kamida 6 oy amal qilish muddati zaxirasi bo‘lishi kerak va pasportda hech qanday belgilarsiz kamida ikkita bo‘sh viza sahifasi bo‘lishi kerak.

Viza uchun kerak bo‘lishi mumkin bo‘lgan qo‘shimcha hujjatlar

• Bolalarning tug‘ilganlik haqidagi guvohnomasi;
• Nikoh to‘g‘risidagi guvohnoma;
• Arizachining uy yoki boshqa yirik ko‘chmas mulkka egaligini tasdiqlaydigan ma’lumotnoma;
• Ishdan ta’til berilganligi to‘g‘risidagi xat; 
• Oxirgi 6 oy uchun bank hisob varag‘idan ko‘chirma;
• Maosh to‘lovi ma’lumotnomalarining asl nusxalari;
• AQSh ta’lim muassasasining kelgusi semestrga qabul qilish haqidagi xati (viza o‘qish uchun bo‘lsa);
• Agar arizachi o‘quvchi bo‘lsa, maktab, kollej yoki universitetdan uning o‘quvchilik maqomini tasdiqlovchi hujjat;
• Sayohat tafsilotlari, shuningdek, birga sayohat qilayotgan boshqa shaxslar ko‘rsatilgan qo‘shimcha xat;
• Konsullik yig‘imi to‘langanligi to‘g‘risidagi ma’lumotnoma.

Tezlashtirilgan so‘rovlar uchun hujjatlar quyidagilarni o‘z ichiga olishi kerak: Viza uchun DS-160 arizaning tasdiqlangan sahifasini nusxasi, pasport nusxasi, tezlashtirilgan tashrif sababi, AQShga sayohat sanalari. 

AQSh vizasini olish uchun suhbatdan o‘tish

Suhbatga ariza to‘ldirilganidan so‘ng, sayt orqali onlayn yozilish kerak (2024-yil, 10-iyundan boshlab, AQSh vizasi olish uchun suhbaga ro‘yxatdan o‘tish yangi veb-sayt orqali amalga oshirilishiga ahamiyat bering). Suhbatni konsullikning rasmiy veb-saytidagi ko‘rsatmalarga muvofiq rejalashtirish kerak. 

Vizaga ijobiy javob berishlari uchun suhbatdan qanday o‘tish kerak? Bu savolga bitta aniq javob yo‘q. Biroq, ba’zi qoidalarga rioya qilish orqali vizani tasdiqlash imkoniyatini oshirish mumkin. Asosiysi, konsul arizachini Amerikada noqonuniy muhojir sifatida qolmasligiga ishonch hosil qilishi kerak. Javoblar anketada ko‘rsatilgan ma’lumotlarga mos kelishi kerak. Konsul safarning maqsadi haqida so‘rashi mumkin. Bundan tashqari, arizachining avvalgi sayohatlari yoki Amerikada qarindoshlari bor-yo‘qligi haqida savollar berishi mumkin. Konsul arizachini vatani bilan qanchalik ko‘p aloqalarni ko‘rsa, tasdiqlash imkoniyati shunchalik yuqori bo‘ladi.

Tashrif maqsadi haqida ham so‘rab o‘tiladi. Tashrif maqsadi vizaga muvofiq holda faqat turizm bo‘lishi kerak. Shuningdek, arizachi sayohat uchun yetarli mablag‘i borligini isbotlashi kerak. Yaqinlarining hujjatlarini ham olsa bo‘ladi. Arizachining farzandlari bo‘lsa, ularning tug‘ilganlik haqidagi guvohnomalarini olib borishi foydali bo'ladi.

14 yoshdan 16 yoshgacha bo‘lgan nomzodlar ota-onasi yoki rasmiy vakili bilan kelishi mumkin. Hamrohlik qiluvchi voyaga yetganlar elchixonaning elektron pochtasi (ConsularTashkent@state.gov) orqali ro‘yxatdan o‘tishlari kerak. 16 yoshdan oshgan shaxslar suhbatga hamrohsiz kirishlari kerak. 

Odatda, suhbatlar o'rtacha o'n daqiqagacha davom etadi. Suhbatga kamida 15 daqiqa oldin kelish kerak. AQSH vizasiga ariza ma'qullansa, konsullik xodimi arizachining pasportini olib, viza bostirilgan pasport beriladigan sana va joy ko‘rsatilgan kuponni beradi. Viza stikeri yopishtirilgan pasportlar keyingi ish kuni soat 15:30 ga qadar tayyor bo'ladi. Hujjatlarni olish uchun ma'muriy yig'im to‘langanligi to'g'risidagi kvitansiyalarni taqdim etish kerak.

AQSH vizasi uchun davlat bojining narxi qancha?

Davlat boji suhbat kunida to'lanadi va har bir fuqaro uchun 185 AQSH dollarini tashkil etadi.

Vizaga to‘lov konsullikda qabul qilinmaydi. Vizaga to‘lov quyidagi usullar bilan amalga oshiriladi:

• Tenge Bankning istalgan filiali orqali naqd pul bilan;
• Elchixonaning rasmiy veb-saytida, AQSh dollarida bank kartasi orqali.

Iyun oyida eski tizim orqali ro‘yxatdan o‘tgan arizachilar, belgilangan kunda suhbatga kelib, vizaga to‘lovni joyida amalga oshirishlari mumkin.

To'lov amalga oshirilganidan so'ng, barmoq izini olish (daktiloskopiya) jarayoniga o'tiladi. 14 yoshdan kichik va 79 yoshdan oshgan fuqarolar uchun barmoq izlari topshirilishi shart emas.

Nima uchun AQSh vizasi rad etilishi mumkin?

Viza rad etilishining sababi har qanday bo‘lishi mumkin. Misol uchun, viza xodimi anketadagi ma'lumotlar va suhbatda arizachining javoblari orasidagi nomuvofiqliklarni aniqlashi mumkin. Ya'ni, oddiy hayajon tufayli arizachi bitta noto'g'ri iborani aytishi va bu shubha uyg'otishi mumkin. 

Viza rad etilishining boshqa sabablari ham bo'lishi mumkin, masalan:

• Arizachining qonun bilan bog'liq muammolari bor (oldingi sayohat paytida Qo'shma Shtatlarda qolish shartlarini buzish, sudlanganlik);
• Arizachining daromadi yetarlicha yuqori emasligi;
• AQShda yashovchi muhojir bo‘lib qolib ketgan yaqin qarindoshlarning mavjudligi;
• Viza tarixining yo'qligi (AQSh yoki Yevropaga sayohatlar umuman yo'qligi).

AQSh vizasi rad etilsa nima qilish kerak?

Viza berish rad etilishining sababi maxsus maxsus hujjatda, ko‘pincha 214b bo'limida ko'rsatiladi. Ushbu bo‘lim viza xodimi arizachining Qo'shma Shtatlarga immigratsiya qilish niyatini aniqlamaganligini anglatadi. Bunday holatda, arizasi rad etilgan arizachi darhol qayta murojaat qilishi mumkin. Boshqa bo'lim ko‘rsatilgan holatlar bundan mustasno.

AQShning O‘zbekistondagi elchixonasiga kirish qoidalari

AQShning O'zbekistondagi elchixonasi shahar markazining shimolida, quyidagi manzilda joylashgan: Toshkent shahri, Yunusobod tumani, 5-kvartal, Moyqo'rg'on ko'chasi 3.

Elchixonaga eng yaqin metro bekati – “Shahriston” (sobiq “Habiba Abdullayev”).

Elchixonaga kirishda quyidagi qoidalarga e'tibor berish kerak:

• Mobil telefonlar, planshetlar, noutbuklar, flesh-disklar, kameralar va shu kabi elektron qurilmalarni elchixona hududiga olib kirish taqiqlanadi; 
• Elchixonaga tashrif buyuruvchilar birma-bir qabul qilinadi;
• Konsullik bo'limi kutish xonasida ichimlik suvi bor, shuning uchun o'zingiz bilan suv olib kelmasangiz ham bo‘ladi;
• Elchixona hududi nogironlarning harakatlanishi uchun moslashtirilgan;
• Elchixonada yoki uning yaqin atrofida tashrif buyuruvchilarning shaxsiy avtomobillari uchun to'xtash joylari yo'q.

Xulosa

AQSh vizasi uchun ariza shaklini oldindan va ehtiyotkorlik bilan to‘ldirish muhimdir. Hatto kichik xatolar ham muammolarga olib kelishi mumkin. Anketani yuborishdan oldin barcha ma'lumotlarni tekshirish kerak. Arizachi AQShning O'zbekistondagi elchixonasiga viza olish uchun murojaat qilganida, tashrif yakunida ortga qaytish niyatini ko'rsatishi muhimdir. Elchixona xodimlari nomzodning Amerikaga tashrifi vaqtinchalik ekanligiga va noqonuniy muhojir sifatida u yerda qolmasligiga ishonch hosil qilishlari kerak. Suhbat chog'ida nomzod konsulga o'z safarining maqsadini tushuntirishi va safar uchun yetarli mablag' mavjudligini tasdiqlovchi hujjatlarni taqdim etishi kerak.