Moskvada bir kunda ko'rishga arziydigan mashhur joylar

Marshrutni rejalashtirish

Moskvada to‘rtta asosiy aeroport mavjud: Sheremetevo, Domodedovo, Vnukovo va Jukovskiy. Vnukovo aeroportidan metro stansiyasigacha bir necha qadamda yetib borish mumkin. Boshqa aeroportlardan esa metroga “Aeroekspress” yoki avtobus orqali yetib borish mumkin. “Aeroekspress” poezdi uchun onlayn chiptalar 525 rubl, sayohat kunida 550 rublga sotiladi. Avtobus chiptalari 350 rubl. 

Shuningdek, har bir aeroportdan chiqishda xususiy haydovchilar ham metrogacha qatnaydi. Ular aeroportdan eng yaqin metro stansiyasigacha 4 kishilik yo‘lovchini olib borishadi, xizmat narxi 300-500 rubl. 

Aeroportdan shaharga kelganingizdan so‘ng qolgan yo‘lni metro orqali davom ettirishingiz mumkin. Marshrut Teatralnaya (Театральная), Ohotny ryad (Охотный ряд) yoki Ploshad revolutsii (Площадь революции) stansiyalaridan boshlanadi. Bu stansiyalarga metro orqali qulay yetib borish mumkin. 2024-yilda bir kunlik cheksiz yo‘l chiptasi 340 rubl, bir martalik chipta esa 70 rubl turadi. Chiptalarni metro kassalaridan sotib olish qulay.

Qizil maydon

Qizil Maydon YuNESKOning jahon merosi ro‘yxatiga kiritilgan. Uning tarixi 11-asrning oxiridan boshlanadi: bu maydon avval savdo, diniy marosimlar va xalq bayramlari uchun, shuningdek, jinoyatchilar qatl qilinishi va podsholik farmonlari e’lon qilinishi uchun xizmat qilgan. Bugungi kunda turistlar Qizil Maydonga (Красная площадь) Kreml (Кремль), Lenin mavzoleyi (Мавзолей Ленина), Uspenskiy sobori (Успенский собор) va Spasskaya minorasini (Спасская башня) ko‘rish uchun tashrif buyurishadi.

Maydonda Rossiyaning eng yirik Tarixiy Muzeyi joylashgan. Muzey 36 zalda katta eksponatlar to‘plamiga ega, jumladan, tanga, qadimiy rus suratlari, kitoblar va qurollar. Rossiya fuqarolari yoki studentlari uchun kirish bepul, boshqa sayyohlar uchun kirish narxi 2000 rublni tashkil etadi. Chiptalarni muzeyning rasmiy saytida oldindan sotib olsa bo‘ladi.

Qizil Maydonda yuz yildan oshiq tarixga ega GUM univermagi ham joylashgan. GUM’ga kirish bepul bo‘lib, har qish, Yangi yil arafasida uning galereyalari bayramona tarzda bezatiladi.

Zaryadye bog'i (Парк Зарядье)

Zaryadye bog‘i 2017-yilda sobiq Rossiya mehmonxonasi (Гостиница Россия) o‘rnida ochilgan va “Time” jurnali tomonidan dunyoning eng yaxshi 100 joylari ro‘yxatiga kiritilgan. Bog‘da Moskva bo‘ylab virtual parvoz qilish, muz g‘orini ko‘rish va yer osti muzeyiga tashrif buyurish imkoniyatlari mavjud. Yozda amfiteatrda bepul konsertlar o‘tkaziladi, bolalar va kattalar uchun tadbirlar ro‘yxati va narxlari haqida ma'lumotlar bog‘ning rasmiy saytida joylashtiriladi.

Tretyakov Galereyasi (Третьяковская галерея)

Tretyakov Galereyasida ikkita bino mavjud: asosiy bino Lavrushinskiy ko‘chasida (Лаврушинский переулок), yangi bino esa Krim valida (Крымский вал) joylashgan. Asosiy binoda 11-20-asrlarga oid rasmlar, haykallar va boshqa san'at asarlari mavjud. Yangi binoda, Krim valida, 20-21-asr avangardistlari, nonkonformistlari va sotsrealistlarning 5000 dan ortiq asarlari namoyish etiladi. Eksponatlar orasida Malevich, Kandinskiy, Deyneka, va Pirosmanining original asarlari mavjud. Shuningdek, vaqtinchalik ko‘rgazmalar, masalan, Repin, Aivazovskiy va Serov asarlari ham tashkil etiladi.

Har bir binoga kirish chiptasi 900 rubl. Dam olish kuni — dushanba. Tretyakov Galereyasida deyarli har doim navbat bo‘lishi mumkin, shuning uchun tashrifni oldindan rejalashtirish va galereya saytida chiptalarni sotib olish tavsiya etiladi.

Gorkiy bog'i (Парк Горького)

Gorkiy bog‘i Moskvaning markaziy bog‘idir va 24 soat ochiq. Bog‘ ichida yo‘laklar, velosiped yo‘llari, kafe, bolalar maydonchalari, pavilyonlar va muzeylar mavjud. 

Iliq mavsumda bog‘da konsertlar, festivallar, yoga sessiyalari va musobaqalar o‘tkaziladi. Shuningdek, raqs va sport maydonchalari faoliyat ko‘rsatadi. Garaj (Гараж) deb nomlangan zamonaviy san'at muzeyi ham bog‘da joylashgan. Barcha tadbirlarning jadvali muzeyning rasmiy saytida e'lon qilinadi.

Qishda bog‘da Moskvadagi eng katta muz maydoni ishlaydi, kechqurun chiroqlar yonib turganda esa juda chiroyli bo‘ladi. Bog‘da qahva, choy, glintveyn va ko‘cha taomlarini sotadigan do‘konlar ham mavjud.

Iso Masihi Sobori (Храм Христа Спасителя)

Iso Masihi Sobori Sovet davrida buzib tashlangan cherkov o‘rnida qurilgan. Uning ichida Iso alayhissalomning kiyimining zarralari va boshqa pravoslav muqaddasotlari saqlanadi. Sobor ortidagi ko‘prikdan Moskva daryosi va Kremlning chiroyli manzarasi ochiladi. Ma'badga va muzeyga kirish bepul, muzey ikki yoki undan ortiq kishi uchun pullik ekskursiyalarni taklif qiladi.
Moskva, Bersenevskaya qirg'og'idan (Берсеневская набережная) Iso Masihi Sobori sobori va ko'prikning ko'rinishi. Foto: pegast.ru

Eski Arbat (Старый Арбат)

Eski Arbat ko‘chasi Moskvaning madaniy va tarixiy markazlaridan biri hisoblanadi. Bu yerda Oltin va Kumush asr yozuvchilari va ziyolilari yashagan, jumladan, Aleksandr Pushkin. Pushkinning sobiq xonadoni hozirda memorial muzeyga aylantirilgan va uning qarshisida shoir va uning rafiqasi Natalya Goncharovaga yodgorlik o‘rnatilgan. Memorial muzeyga kirish narxi 250 rubl. 

Arbat ko‘chasidagi Pushkinning memorial muzeyi. Foto: britishclub.ru

Arbat ko‘chasida shuningdek, ko‘rgazmalar va turli installyatsiyalar doimiy ravishda namoyish etiladi.

Moskva Siti (Москва-Сити)

Foto: excurspb.ru

Moskva Siti — bu Presnenskaya sohilida (Пресненская набережная) joylashgan zamonaviy osmono‘par binolar majmuasi bo‘lib, 19 ta turli balandlikdagi minoralardan iborat. Eng baland binosi Federatsiya minorasi (башня Федерация) bo‘lib, uning balandligi 97 qavatni tashkil etadi. Tashqaridan bu shishali binolar asosan ofislar sifatida ko‘rinishi mumkin, ammo ular ichida apartamentlar, fitnes-klublar, restoranlar, do‘konlar va kuzatuv maydonchalari mavjud. Shuningdek, katta savdo markazi Afimoll (Афимолл Сити) ham shu yerda joylashgan.

Federatsiya minorasining 89-qavatidagi kuzatuv maydonchasiga chipta narxi 2490 rubl. Chipta sotib olish uchun kuzatuv maydonining rasmiy saytidan foydalansa bo‘ladi. Bu narxga muzqaymoq va shokolad ishlab chiqarish sexiga ekskursiya, taomlar va 3D-kvest kiradi.

Kun davomida qayerda ovqatlansa bo‘ladi?

Moskva har qanday mamlakat oshxonasini topish mumkin bo‘lgan joy. Markazda arzon tushlik qilmoqchi bo‘lganlar Qizil maydondagi GUMning uchinchi qavatidagi "Stolovaya № 57"ga (Столовая №57) tashrif buyurishlari mumkin. 

Shuningdek, shaharda hamyonbop ovqatlanish uchun bir nechta variantlar mavjud:

• Oshxonalar: Arzon ovqatlanmoqchi bo‘lganlar uchun klassik tanlovdir. Oshxonalar ko‘pincha birinchi va ikkinchi taomlar hamda ichimliklardan iborat kompleks tushliklarni taklif qiladi. O‘rtacha hisob 300-500 rublgacha bo‘ladi.
• Tezkor kafelar: KFC, Burger King va McDonald's kabi joylarda tez va hamyonbop ovqatlanish mumkin. Bunday joylardagi narxlar tanlangan taomga qarab o‘zgaradi, ammo o‘rtacha 300-500 rublni tashkil etadi.
• Kavkaz taomlari kafelari: Xachapuri, shashlik va lyulya-kebab kabi taomlarni kavkaz kafelarida tatib ko‘rish mumkin. Bunday joylarda ovqatlanish o‘rtacha bir kishi uchun 500-700 rublni tashkil etadi.
• O‘zbek oshxonalari: Palov, somsa va lag‘mon kabi o‘zbek milliy taomlari ham byudjetga mos variant hisoblanadi. O‘zbek oshxonalarida ovqatlanish odatda yevropacha restoranlarga qaraganda arzonroq bo‘lib, o‘rtacha 500 rublga bir kishi to‘liq tushlik qilishi mumkin.

Osiyo oshxonasi: Vyetnamcha pho, taycha lapsha va qovurilgan guruch kabi taomlar Janubi-Sharqiy Osiyo oshxonasiga mansub bo‘lib, ularning narxlari ham hamyonbop sanaladi. Bunday kafelar asosan savdo markazlaridagi fud-kortlarda joylashgan bo‘lib, taomlarning o‘rtacha narxi 450-500 rubldan boshlanadi.

Arzon narxlar bilan mashhur tarmoqlar:

• Teremok (Теремок): Tezkor xizmat ko‘rsatuvchi tarmoq, turli xil ichimliklar bilan blinchiklar tayyorlaydi.
• Shokoladnitsa (Шоколадница): Kafelar tarmog‘i, bu yerda kofe va desert yoki to‘liq tushlikni 400-700 rublga sotib olish mumkin.

Moskvadagi bir kunlik xarajatlar:

Umumiy hisoblaganda bir kun uchun xarajatlar quyidagicha:

• Aeroekspress bilan aeroportga borish va qaytish — 1050 rubl;
• "Moskva-City" kuzatuv maydonchasiga chipta — 2490 rubl;
• Kafelarda tushlik (ikki marta) — 1000 rubl;
• Metro uchun cheksiz kunlik chipta — 340 rubl.

Shunday qilib, kun davomida bitta pullik tadbirga tashrif buyursangiz, o‘rtacha 5000 rubl xarajat qilinadi. Bu hisob-kitobga sovg‘alar va shopping kiritilmagan. Ba'zan barcha tadbirlarni bir kunda o‘tishga vaqt yetmasligi mumkin, shuning uchun bitta pullik va bitta bepul tadbirni tanlash tavsiya etiladi.