Sayohat
5 noyabr
views1K

Green card lotereyasida yutish ehtimoli qanchaga teng?

2024-yilgi Green Card lotereyasi uchun arizalar qabul qilish muddati yana 2 kunga uzaytirildi. Endi arizalarni 7-noyabrgacha topshirish mumkin. Bu imkoniyat hech qanday xarajat talab qilmaydi va AQShga immigratsiya qilishning eng arzon va oson yo‘llaridan biri sanaladi. Ammo lotereyada qatnashmoqchi bo‘lganlar uchun asosiy savol — yutish ehtimoli qanday? Quyida o‘tgan yillardagi yutuqlar soniga tayangan holda ehtimolni hisoblab chiqdik.
article-image

Foto: collectphoto.ru

Green card lotereyasi tanlovi qanday o‘tadi?

Green card lotereyasida har yili dunyo bo‘ylab tasodifiy tanlangan 50 ming kishi va ularning oila a’zolari AQShga immigratsiya qilish imkoniyatini qo‘lga kiritadi. Bunda mamlakat fuqarolikka qarab emas, balki arizachining tug‘ilgan joyiga qarab belgilanadi. Avval ko‘p sonli odamlar immigratsiya qilgan mamlakatlar (masalan, Xitoy va Hindiston) lotereyadan chetlashtiriladi.

Green card lotereyasiga ariza kuzda topshiriladi, natijalar esa bahorda e’lon qilinadi (masalan, bu yilgi natijalar 2025-yil mayida chiqishi kutilmoqda).

Green card olish uchun ro'yxatdan o'tish qanday amalga oshiriladi?

 Agar arizachi yutsa, suhbatdan o‘tish va immigratsiya vizasini olish jarayoni bir yil yoki undan ko‘proq vaqt olishi mumkin. Lekin, yutish hali AQShga immigratsiya imkoniyatini qo‘lga kiritganingizni anglatmaydi: ba’zilarni umuman suhbatga chaqirishmaydi, ayrimlar suhbatdan o‘ta olmaydi, ba’zilari esa o‘z fikridan qaytadi.

AQSh Davlat departamentining statistik ma’lumotlariga ko‘ra, 2021-yilda dunyo bo‘ylab 6,7 million ariza topshirilgan, agar qatnashuvchilarning oila a’zolarini ham qo‘shsak, umumiy ishtirokchilar soni 11 830 707 nafarni tashkil etadi. Keyingi yil, ya’ni 2022-yilda, green card lotereyasi bo‘yicha immigratsiya vizalari 54 334 kishiga berilgan, bu 50 mingli kvotadan biroz ko‘proq.

Green card yutuqlari har bir mintaqa (masalan, Yevropa, Osiyo, Afrika) uchun ajratilgan vizalar doirasida tasodifiy tanlanadi. Har bir mamlakatdan kelib tushgan arizalar soni turlicha bo‘lgani uchun, yutish ehtimoli ham arizalar soniga qarab o‘zgaradi. Shu bilan birga, hech bir mamlakat umumiy yutuqlar sonining 7%idan ko‘prog‘ini yoki 3 500 tadan ortiq vizani ololmaydi. 

O'zbekiston fuqarolari uchun AQSh vizasini olish

Natijada, green cardga arizalar soni kam bo‘lgan mamlakatlarda yutish ehtimoli nisbatan yuqori bo‘lishi mumkin, ko‘p ariza topshirilgan davlatlarda esa bu ehtimol pasayadi.

2023-yilda green card yutug‘i orqali eng ko‘p viza olgan yetakchi 10 mamlakat:

  • Jazoir — 3 845;
  • Nepal — 3 340;
  • Rossiya — 2 907;
  • Marokash — 2 772;
  • Misr — 2 687;
  • O‘zbekiston — 2 384;
  • Armaniston — 2 318;
  • Sudan — 1 975;
  • Qirg‘iziston — 1 887;
  • Tojikiston — 1 675.

MDH mamlakatlari ichida 2023-yilda viza olgan davlatlar ro‘yxati:

  1. Rossiya — 2 907;
  2. O‘zbekiston — 2 384;
  3. Armaniston — 2 318;
  4. Qirg‘iziston — 1 887;
  5. Tojikiston — 1 675;
  6. Ukraina — 1 632;
  7. Qozog‘iston — 1 285;
  8. Belarus — 1 041;
  9. Ozarbayjon — 514;
  10. Turkmaniston — 377;
  11. Moldova — 358.

Green card lotereyasida yutish ehtimolining hisob-kitobi

Har bir MDH mamlakati uchun green card yutish ehtimolini hisoblaymiz. Barcha topshirilgan arizalar soni bo‘yicha yangiroq ma’lumotlar hali mavjud emasligi sababli statistikalar 2021-2022 yillar ma’lumotlariga asoslangan. Raqamlardagi o‘xshashlik tufayli farq unchalik katta bo‘lmaydi:

Davlat Green card ishtirokchilari soni DV vizalar soni Yutish nisbati Imkoniyat
O‘zbekiston 832 938 2 399 0.29% 1 ga 343
Moldova 214 036 478 0.22% 1 ga 448
Tojikiston 162 200 711 0.44% 1 ga 228
Estoniya 2 195 10 0.46% 1 ga 220
Latviya 5 585 26 0.47% 1 ga 213
Rossiya 533 169 2 642 0.50% 1 ga 202
Belarus 166 646 852 0.51% 1 ga 196
Litva 35 405 185 0.52% 1 ga 192
Qozog‘iston 155 204 832 0.54% 1 ga 186
Ukraina 426 290 2 542 0.60% 1 ga 166
Ozarbayjon 108 905 713 0.66% 1 ga 153
Armaniston 160 965 1 282 0.80% 1 ga 126
Turkmaniston 56 188 546 0.97% 1 ga 103
Qirg‘iziston 133 063 1 388 1.04% 1 ga 96
Gruziya 112 464 1 272 1.13% 1 ga 88

Xulosa

Shunday qilib, green card lotereyasida moldovaliklar, o‘zbekistonliklar va tojikistonliklar uchun yutish imkoniyati gruzinlar, qirg‘izistonliklar, turkmanistonliklar va armanlarga qaraganda pastroq. Rossiyaliklar, ukrainaliklar va o‘zbekistonliklar ko‘p miqdorda vizalar olishgan, ammo ushbu davlatlardan ariza topshirganlar soni ham yuqori bo‘lganligi sababli yutish ehtimoli nisbatan kam. 

Yutuq qo‘lga kiritilgach esa konsullik to‘lovini amalga oshirib, suhbatdan o‘tish kerak. Suhbatdan o'tganlarga esa yana tibbiy ko‘rik, sug‘urta va chiptalar kabi xarajatlar uchun 5 mingdan 20 ming AQSh dollarigacha pul talab etiladi. Bu boshqa immigratsiya yo‘llariga qaraganda arzonroq, lekin bunday xarajatlar ham hamma uchun mos emas. 

Fikr qoldiring
Barcha sharhlar chop etilishidan oldin moderatsiyadan o'tadi