Mobil raqamni qanday qilib ko'chirish mumkin?

Raqamni o'zgartirish ko'pincha banklar va boshqa resurslarga bog'langanligi, shuningdek, barcha tanishlaringiz sizning raqamingizni bilishi tufayli qiyinchilik tug'dirishi mumkin. Ammo agar siz operator xizmatidan norozi bo'lsangiz yoki boshqa operatorning qulayroq tarif rejasiga o'tishni xohlasangiz, Mobile Number Portability (MNP) xizmati raqamni saqlagan holda operatorni o'zgartirish imkonini beradi.

Kimlar raqamni ko'chirish xizmatidan foydalanishi mumkin?

Beeline, Humans, Mobiuz, Ucell va Uztelecom abonentlari MNP xizmatidan foydalanishlari mumkin. Perfectum va Uzmobile operatorlarining CDMA standartli raqamlariga ega foydalanuvchilar esa bu xizmatdan foydalana olmaydi.

Raqamni ko'chirish uchun nima qilish kerak?

Raqamni qayta rasmiylashtirish uchun abonent shaxsini tasdiqlovchi pasport, ID-karta yoki xorijiy pasport kerak bo'ladi. Arizani faqat raqam egasi yoki uning vakolatli shaxsi ishonchnoma orqali topshirishi mumkin. Qayta rasmiylashtirish jarayoni bir necha qadamdan iborat:

Sharhlarga ko'ra, raqamni saqlab qolgan holda boshqa mobil operatorga o'tish 20-30 daqiqa ichida amalga oshiriladi.

Raqamni ko'chirish bosqichlari. Foto: mnp.uz

Raqamni saqlab qolish narxi qancha?

Beeline, Uztelecom, Mobiuz va Ucellga o'tishda xizmat narxi 60 ming so'm, Humansda esa bepul. Operatorni almashtirganda balans nolga tushadi. Agar eski operator hisobida mablag' qolsa, uni qaytarish uchun eski operatorning ofisiga murojaat qilish kerak bo'ladi.

Operator almashsa xizmatlar saqlanib qoladimi?

Mablag'larni bir operator hisobidan boshqa operator hisobiga to'g'ridan-to'g'ri ko'chirish texnik jihatdan imkonsiz. Har bir operator turli to'lov tizimlarini qo'llaydi va ular o'zaro bog'liq emas. Raqamni ko'chirish vaqtida mablag'larni qaytarish uchun avvalgi mobil aloqa operatoringizning ofisiga ariza bilan murojaat qilishingiz kerak.

Raqam ko'chirilayotganda barcha xizmatlar va paketlar bekor qilinadi, foydalanilmagan limitlar tugaydi. Shuningdek, barcha to'lov ilovalari uchun kartalarni qayta bog'lash kerak bo'ladi. Chunki SMS-xabarnoma xizmatlari to'xtaydi va ularni ham qayta sozlash zarur bo'ladi. SIM karta yechiladi va SMS xabarnomalarni yaqin atrofdagi bankomatda qayta ulash kerak bo'ladi.

Qisqacha qilib aytganda, raqamni ko'chirishda barcha xizmatlar va paketlar bekor qilinadi hamda yangi operator bilan qayta ulanish talab qilinadi. Shuning uchun raqamni ko'chirgandan so'ng quyidagi qadamlarni amalga oshirish kerak:

SMS-xabarnomalar va ilova ogohlantirishlarini qayta ulash:

1. Bank ilovasini oching va sozlamalar bo'limiga kiring.
2. "SMS-xabarnomalar" yoki "Ilova ogohlantirishlari" bo'limini toping.
3. Yangi raqamni kiriting va uni faollashtiring.

To'lov ilovalari uchun kartalarni qayta bog'lash:

1. Har bir to'lov ilovasini oching (Payme, Click yoki boshqalar).
2. Ilovaning sozlamalariga kiring va kartani qayta bog'lang.
3. Raqamni qayta kiriting va SMS-xabarnoma xizmatlarini faollashtiring.

Telefonni qayta yoqish:

Telefoningizni o'chiring va qayta yoqing.

Xizmat rad etilishining sabablari

Avvalroq ko'plab foydalanuvchilar operatorlar raqamni ko'chirishni rad etishi va pasport ma'lumotlarini yangilashni talab qilishlari bilan bog'liq muammoga duch kelishdi. Ko'pchilikning raqamlari eski pasportlarga ro'yxatga olingan, shuning uchun operator ma'lumotlaringizni bazaga kiritib, raqamni ularga bog'lay olmaydi. Agar operatorni almashtirmoqchi bo'lsangiz, avval pasport ma'lumotlaringizni amaldagi ID-karta yoki pasportlarga yangilang.

Shuningdek, quyidagi holatlarda ham operatorni almashtirish rad etilishi mumkin:

• Eski operatorda qarz yoki minus hisob bo'lsa.
• Shaxsiy ma'lumotlar eskirgan bo'lsa.
• Oxirgi ko'chirishdan 30 kundan kam vaqt o'tgan bo'lsa.
• Tarif rejasi yoki "chiroyli" raqamlar bo'yicha majburiyatlar bo'lsa.

Agar ariza rad etilgan bo'lsa, quyidagicha yo'l tutish mumkin:

• Shaxsiy ma'lumotlarni yangilash.
• Qarzlarni to'lash va yana ariza berish.
• Oldingi ko'chirishdan bir oy o'tmagan bo'lsa, 30 kun kutish.
• Bloklangan raqamni blokdan chiqarish.