O’zbekistonda katta kompaniyalarning bonus dasturlari foydalimi?

Bonus yoki sodiqlik dasturlari — bu mijozlarni kompaniyadan ko'proq va tez-tez sotib olishga undaydigan usullar to‘plamidir. Mijozlar bonus dasturlarida qatnashganlarida, ushbu kompaniya mahsuloti yoki xizmatlaridan foydalanganligi uchun bonuslar, chegirmalar yoki boshqa imtiyozlarni oladilar. Oddiy qilib aytganda, bonus dasturi mavjud mijozlarni saqlab qolish imkonini beruvchi mukofotlash tizimidir.

Qaysi kompaniyalarning bonus dasturlari eng foydali?

Mijozlarga turli imtiyozlarni taqdim etuvchi bonus dasturlari O‘zbekistonda tobora ommalashib bormoqda. Deyarli barcha mijozlar bilan ishlaydigan katta kompaniyalarda bonus dasturlari mavjud. Ularni maxsus veb-saytlar orqali topish mumkin. Biz eng mashhur va butun Respublika bo‘ylab amal qiladigan bonuslarni keltirib o‘tdik.

Beeline

Beepul — bu Beeline O‘zbekiston tomonidan taqdim etiladigan sodiqlik dasturi bo‘lib, foydalanuvchilar BEEP deb nomlangan bonus ballarini to‘plashlari va ularni turli imtiyozlarga almashtirishlari mumkin. Beepul dasturidan foydalanish uchun Android va iOS do‘konlari orqali ilovani yuklab olishi kerak.
Dastur shartlari:
Beeline xizmatlariga to‘lov qilganda har 1 000 so‘m uchun 1 BEEP taqdim etiladi.
Boshqa xizmatlarga to‘lov qilganda har 2 000 so‘m uchun 1 BEEP taqdim etiladi.
Kartadan kartaga pul o‘tkazmalari uchun har 10 000 so‘m uchun 1 BEEP taqdim etiladi.
Barcha foydalanuvchilar Beepul dasturidan foydalanishi mumkin.
To‘plangan BEEPlarni Beeline oldindan to‘lov tizimi abonentlari internet va daqiqa paketlariga almashtirishlari mumkin. 90 kun davomida foydalanilmagan BEEPlar bekor qilinishi mumkin. Beepul ilovasi orqali BEEP balansini tekshirish va ballarni kuzatish imkoniyati mavjud. Internet va daqiqa paketlari 7 yoki 30 kun amal qiladi. Bayram yoki tug‘ilgan kunlarda bonus olish uchun Beepul ilovasidagi xabarnomani ochib, “Bonusni olish” tugmasini bosish kerak.

Mobiuz

Mobiuz bonus dasturi abonentlarga mobil ilovadan foydalanganlik uchun bonus ballar to‘plash va ularni qo‘shimcha xizmatlarga almashtirish imkoniyatini taqdim etadi. Aksiyada ishtirok etish uchun Mobiuz mobil ilovasini yuklab olib, ro‘yxatdan o‘tish lozim.

Dastur shartlari:

• Ilovada birinchi marta ro‘yxatdan o‘tgan abonentlarga 500 ball miqdorida bir martalik bonus beriladi.
• Har 1 000 so‘m hisob to‘ldirilganida abonent 15 ball oladi.
• Boshqa xizmatlarga to‘lov qilganda yoki taklif qilingan abonent kartasini bog‘laganda qo‘shimcha ballar yig‘ish mumkin.

To‘plangan ballar internet-paketlarga almashtirilishi mumkin. Misol uchun, 500 ballga 100 MB, 1000 ballga 300 MB internet-paket sotib olish mumkin. Paketlar o‘z raqamingizga yoki boshqa Mobiuz abonentining raqamiga ulanishi mumkin.

Ucell

Al Chiroq — bu Ucell tomonidan taqdim etilgan sodiqlik dasturi bo‘lib, abonentlar kuniga atigi 500 so‘m evaziga bonus daqiqalar, SMS va internet-trafiklardan foydalanish imkoniyatiga ega. Al Chiroq dasturidan foydalanish uchun Android yoki iOS ilovasini yuklab olish, shuningdek, xizmatning telegram-botiga ulanib foydalanish mumkin.

Dastur shartlari:

• Kunlik to‘lov — kuniga 500 so‘m.
• Bonuslar olish — har kuni tasodifiy tarzda daqiqalar, SMS va internet to‘plamlari taqdim etiladi. Bitta kunda uch marta bonus olish imkoniyati mavjud.
• “Premium chiroq” funksiyasi — olingan bonuslar orasidan tanlash imkonini beradi.

To‘plangan bonuslar internet-paket, SMS va daqiqalar sifatida Ucell tarmog‘ida sarflanishi mumkin. Bayram va maxsus kunlarda Al Chiroq ilovasi orqali qo‘shimcha bonuslar olish imkoniyati mavjud.

Korzinka.Uz

Korzinka supermarketlar tarmog‘i hamda “Smart”, “Redtag” va “Flo” do‘konlarida amalga oshirilgan xaridlar uchun bonus tizimi amal qiladi. Bonuslardan foydalanish uchun Korzinka Mobil ilovasini yuklab olish zarur. Ilovani App Store yoki Google Playdan yuklab olish mumkin.

Asosiy shartlar:

• Har bir xarid uchun chek summasining 1% miqdorida bonus hisobiga kafolatlangan keshbek tushadi.

• Oylik retro bonus olish uchun oy davomidagi xaridlar summasi kamida 1 300 000 so‘m bo‘lishi kerak.
• Choraklik retro bonus olish uchun chorak davomida xaridlar summasi kamida 4 500 000 so‘m bo‘lishi talab etiladi.

Shunday qilib, dastur orqali xaridlaringizdan 3% gacha bonus to‘plash imkoniyatiga ega bo‘lasiz.