Pulli gap
3 iyun
ico152

Uy-joyni ta’mirlash uchun kredit olish mumkinmi?

Uy-joyingizni ta’mirlab, yashash sharoitingizni yaxshilashni xohlaysizmi? Bank kreditlari yordamida rejalaringizni qanday amalga oshirish mumkinligi haqida ma'lumot beramiz.
article-image

Foto: kronco.ru

Ba'zan uy ta'miri darhol talab qilinishi mumkin. Masalan, to'y oldidan yoki ko'p qavatli binoda kanalizatsiya muammolari tufayli uyda suv toshganda. Bunday holatda ta'mirni kechiktirib, mablag‘ yig‘ish yoki kredit olish variantlarini ko‘rib chiqishingiz mumkin.

Qurilish materiallari bozori tez-tez o'zgaradi va narxlar doimiy oshadi. Bu holatni ta'mir xarajatlarini rejalashtirishda hisobga olish muhimdir. Ta'mir turiga qarab, kredit olish ko'pincha foydaliroq bo'lishi mumkin, chunki yig'ilgan pul inflyatsiya ta'sirida qadrsizlanishi va kredit foizi bu darajadan past bo'lishi mumkin.

Uy ta'miri uchun kreditni kim taqdim etadi?

Agar xonadoningizni ta'mirlash uchun zarur mablag'ga ega bo'lmasangiz, “Ipotekani qayta moliyalashtirish kompaniyasi” aksionerlik jamiyatining ("O'zIQMK" AJ) Qayta moliyalashtirish dasturi bo'yicha taqdim etiladigan kreditlardan foydalanishingiz mumkin. Ushbu dastur doirasidagi kreditlar ipoteka va ta'mir uchun mo'ljallangan.

Ta’mir krediti talablari va shartlari

Turar-joyingizni ta’mirlash yoki qayta qurish uchun kredit olish bugungi kunda ko'plab uy egalariga qulay imkoniyatlar taqdim etadi. Bu jarayonda quyida keltirilgan shartlar va talablarga rioya qilgan holda, moliyaviy imkoniyatlaringizni kengaytirishingiz mumkin.

Kreditlash uchun to'g'ri keladigan turar-joy turi:

  • Yakka tartibda qurilgan uy-joylar (hovli) yoki ko'p qavatli uydagi xonadonlar.
  • Yashashga tayyor bo'lmagan uylar talabga nomuvofiq hisoblanadi.

Qarz oluvchilar uchun qo'yilgan shartlar:

  • Doimiy daromad manbaiga ega bo'lgan shaxslar.
  • Qarz oluvchi kamida 18 yoshda bo'lishi kerak.

Kreditning limiti va muddati:

  • Taʼmir uchun eng yuqori kredit miqdori: 80 million so'm.
  • Eng uzoq muddat: 10 yil.

Oldindan to'lov:

  • Talab qilinmaydi.

Kredit oluvchining daromadiga qo'yiladigan talablar:

  • Qarz oluvchining oylik sof daromadi maksimal 15 million so'mni tashkil etishi kerak.
  • Agar daromad yetarli bo'lmasa, qo'shimcha qarzdor sifatida faqat birgalikda yashovchi xo'jalik a'zolarini jalb qilish mumkin.

Kreditning qaytarish jadvali:

  • Har oylik to'lov (annuitet shaklida), imtiyozli davrsiz.

Kreditning garovi:

  • Taʼmirlanadigan uy.

Kredit tarixi qanday bo'lishi kerak:

  • Muddati o'tgan (30 kundan ko'p) qarzdorlik bo'lmasligi kerak.

Turar-joy mulkini baholash:

  • Maxsus litsenziyaga ega mustaqil baholovchi tomonidan baholanishi kerak.

Ikkinchi ipoteka krediti:

  • Mumkin emas.

Ta’mirlash uchun taqdim etiladigan kredit summasini berish pudrat qurilish tashkilotining yoki qurilish materiallari sotuvchi korxonaning hisobiga pul o'tkazish yo'li bilan amalga oshiriladi.

Talab etiladigan hujjatlar:

  • Ariza;
  • Pasport nusxasi;
  • Daromad to'g'risida ma'lumotnoma;
  • Mavjud uy-joyni ta’mirlash bo'yicha xarajatlar smetasi;
  • Mustaqil baholovchi tomonidan taqdim etilgan uy-joyning baholash hisoboti.

Kreditni qaysi banklardan olish mumkin?

Qayta moliyalashtirish dasturi resurslari hisobidan quyidagi tijorat banklari ipoteka kreditlarini taqdim etadi:

  • Ipoteka-bank ATIB
  • O'zsanoatqurilishbank ATB
  • Asaka Bank ATB
  • Qishloq qurilish bank ATB
  • Hamkorbank ATB
  • Infinbank ATB
  • Kapitalbank ATB
  • Turonbank ATB
  • OrientFinanceBank XATB
  • Agrobank ATB
  • O'zmilliybank AJ
  • Xalq Bank ATB

Ta'mir uchun kredit olishning ijobiy va salbiy tomonlari

Kvartirani ta'mirlash uchun kreditning ijobiy tomonlari:

Ta'mirni tezroq amalga oshirish imkoniyati:

  • Pul yig'ishni uzoq kutishning hojati yo'q, kerakli natijani darhol olish mumkin.
  • Ayniqsa, ta'mir zudlik bilan talab qilinganda, masalan, eskirgan uy-joy yoki favqulodda vaziyatlarda dolzarbdir.

Keng qamrovli loyihalarni amalga oshirish:

  • Kredit kompleks ta'mirni, qayta rejalashtirishni, elektr simlarini almashtirish va boshqa qimmat ishlarni amalga oshirish imkonini beradi.
  • Yuqori sifatli materiallar va dizayn yechimlarini qo'llash imkoniyatini beradi.

Belgilangan to'lovlar:

  • Kredit bo'yicha oylik to'lovlar butun shartnoma muddati davomida bir xil bo'ladi, bu esa byudjetni oldindan rejalashtirish va kutilmagan xarajatlardan xavotirlanmaslik imkonini beradi.

Foto: dzen.ruFoto: dzen.ru

Kvartirani ta'mirlash uchun kreditning salbiy tomonlari:

Ortiqcha to'lovlar:

  • Qarzni ishlatganlik uchun bankka foiz to'lash kerak bo'ladi.
  • Kredit summasi va muddati qancha ko'p bo'lsa, ortiqcha to'lov shuncha yuqori bo'ladi.

Moliyaviy yuk:

  • Kredit bo'yicha oylik to'lovlar byudjet uchun og'irlik qilishi mumkin, ayniqsa, boshqa kreditlaringiz yoki to'lovlaringiz bo'lsa.
  • Ishdan ayrilish yoki daromadlar qisqarishi holatlarida kreditni to'lashda qiyinchiliklar yuzaga kelishi mumkin.

Uy-joyni yo'qotish xavfi:

  • Kredit kvartira garovi bilan rasmiylashtirilishi sababli, majburiyatlarni bajarmaslik holatida bank uy-joyni savdoga qo'yishi mumkin.

Qo'shimcha xarajatlar:

  • Foizlardan tashqari, kredit rasmiylashtirish, sug'urta, ko'chmas mulkni baholash va boshqa qo'shimcha xarajatlar bo'lishi mumkin.

Imkoniyatlarning cheklanishi:

  • Kredit rasmiylashtirilganda, bank tomonidan tasdiqlangan summa bilan cheklanib qolishingiz mumkin.
  • Ba'zi g'oyalarni amalga oshirishdan voz kechish yoki byudjetga sig'dirish uchun kamroq sifatli materiallarni tanlashga majbur bo'lishingiz mumkin.

Umuman olganda, ta'mir uchun kredit olish foydali yechim bo'lishi mumkin. Agar siz bu bilan bog'liq barcha xatarlarni tushunsangiz va moliyaviy majburiyatlarni qabul qilishga tayyor bo'lsangiz. Yakuniy qarorni qabul qilishdan oldin barcha ijobiy va salbiy tomonlarni sinchkovlik bilan ko'rib chiqishingiz kerak.

Fikr qoldiring
Barcha sharhlar chop etilishidan oldin moderatsiyadan o'tadi
Biz cookie-fayllardan foydalanamiz. Saytdan foydalanishni davom ettirish orqali siz roziligingizni bildirasiz