Uyni konditsionersiz sovitish usullari

Eng yomon tomoni, hozirda g'ishtli uylardan ko'ra panelli uylar ko'proq. Ular tezroq isiydi. Bu vaziyatni yanayam og'irlashtiradi. Agar xonadonda shiftlar past, derazalar kam va xonalar kichkina bo'lsa, harorat yanada kuchliroq seziladi. Xonadon yuqori qavatda, qizigan tom ostida joylashgan bo'lib, o'rtada hech qanday texnik qavat bo'lmasa uyning dimligi chidab bo'lmas darajaga yetishi mumkin. Shunday vaziyatda uyingizda konditsioner yoki shamol parraklari bo'lmasa, xonalarni sovitishning yana bir qancha samarali usullari mavjud.

Xonaga yorug'lik tushishini to'sib qo'yish

Xonani salqinlatishning eng tez va eng oson yo'li xonaga yorug'lik tushishini to'sishdir. Buning uchun bulutli havoda ham derazalarni parda yoki jalyuzi bilan berkitish kerak. Natijada xona harorati bir necha darajaga pasayishi mumkin. Bu usul uyda konditsioner mavjud bo'lganda ham foydali bo'lishi mumkin, ammo u kunduzi o'z vazifasini to'liq bajara olmaydi.

Pardalar va jalyuzilarni yopish

Termal (infraqizil) nurlanish xonaga nafaqat to'g'ridan-to'g'ri quyosh nuri shaklida, balki bulutlar orqali tarqoq holda ham tarqaladi. Ushbu nurlanishni qaytarish uchun pardalar qalin va och rangda bo'lishi kerak. Shundagina ular yorug'likni yaxshiroq qaytaradi. Ertalab va kunduzi pardalarni yopiq holatda ushlash kerak. Kechki payt esa ochib qo'yish mumkin. Mato yoki temir jalyuzilar bu vazifani ancha samarali bajaradi va yorug'likning 90% gacha to'sib qo'yadi. Umuman olganda, qorong'u qilish nafaqat xonadonni quyosh nurlarining tushishidan himoya qiladi, balki elektr jihozlari, gilamlar va hokazolarning qizib ketishiga yo'l qo'ymaydi, bu bilan uyning harorati yanada ko'tarilishining oldi olinadi. Derazalardagi pardalarni ertalab soat 8 dan kechiktirmay yoki undan oldinroq tushirib qo'yish kerak.

Foto: moskva-jaluzi.ru

Derazalarni plyonka yordamida qoraytirish

Jazirama havoda xonani salqinlatishning yaxshi usullaridan yana biri - bu derazalarni maxsus yorug'lik qaytaruvchi plyonka bilan qoplashdir. Uni sotib olayotganda yorug'lik o'tkazuvchanligini va infraqizil nurlanishni qaytarish darajasini hisobga olish kerak. Bu xonaga qishda ham qancha yorug'lik tushishini belgilab beradi. Chunki plyonka odatda derazalarda qoladi va sovuq davrda quyosh nuri xonadonni umuman isitmasligi yaxshi emas. Plyonka quyosh nurlanishini qanchalik yaxshi qaytarsa, xona harorati shuncha pasayadi.

Folgadan foydalanish

Folga ham xonani yuqori haroratdan yaxshi himoya qiladi. Buning uchun 5 yoki 6 metrli rulonni sotib olish va derazalarni ichkaridan butunlay bekitish kerak. Agar derazalar janubga - issiqlik kuchliroq seziladigan tarafga qaragan bo'lsa, bu usul ayniqsa foydalidir. Folganing yagona kamchiligi - uning ko'rinishidir, biroq buning yechimi bor: uni shunchaki pardalar bilan bekitilsa, xona ko'rinishiga ta'sir qilmaydi.

Xonalarni o'z vaqtida shamollatib turish

Xonani to'g'ri va tizimli shamollatish ham haddan tashqari issiqlikdan saqlanish va uyni salqinlatishga yordam beradi. Ushbu taomil kechasi va ertalab ma'lum soatlarda bajarilishi kerak. Biroq shu bilan birga, uyda yelvizak hosil qilish turli kasalliklarga chalinish xavfini oshiradi, shuning uchun uni hosil qilmaslik yaxshiroqdir.

Kun davomida. Kunduzi xonani shamollatish noto'g'ri, chunki tashqaridan issiq havo oqimi xonaga kiradi va salqin havo, aksincha, chiqib ketadi. Shu sababli, kunduzi, ayniqsa quyosh eng faol bo'lgan soat 12 dan 16 gacha, derazalar yopiq va pardalar bilan to'silgan bo'lishi kerak.

Tunda. Eng past harorat ertalab soat 4 dan 7 gacha kuzatiladi, aynan shu paytda derazalarni ochish kerak. Juda erta turmaslik uchun, buni yotishdan oldin qilishingiz va ularni ertalab soat 8 dan oldin yopishingiz mumkin. Agar xonadonga qaraganda tashqaridagi havo issiqroq bo'lsa, unda shamollatish zarur emas.

Uyni namlantirish

Yuqoridagi usullarga xonani namlantirishni ham qo'shsak, uydagi harorat darajasining sezilarli darajada kamayganini sezish mumkin. Buning uchun suv bilan tozalash, muz yoki ho'l choyshabdan foydalanish va hokazo usullarni qo'llash mumkin.

1. Suv bilan tozalash

Xonani sovitish va quruq havoni kamaytirish uchun pollarni va barcha sirtlarni iloji boricha tez-tez sovuq suv bilan yuvish kerak. Gilamni poldan olib tashlash kerak, chunki u issiqlikni kuchli tortadi va yaxshi issiqlik izolyatori hisoblanadi. Bundan tashqari, suv purkagich yoki maxsus elektron namlantirgich yordamida kun davomida uy havosini namlantirish lozim.

2. Nam choyshablardan foydalanish

Ba'zilar issiq havoda nam choyshabdan foydalanishni - ular bilan yopinish yoki to'shakka qo'yishni tavsiya qiladi, ammo bu sog'liq uchun xavflidir. Shifokorlarning fikriga ko'ra, odamda buyrak kasalligi yoki pnevmoniya rivojlanishi, shamollash alomatlari masalan, isitma, holsizlik, burun bitishi, yo'tal paydo bo'lishi mumkin. Shu sababli, quloqlar, tirsaklar, bilaklar va tizzalarga sovuq narsalarni qo'ymaslik kerak. Sovuq sochiqni bosh atrofiga o'rash mumkin, lekin uzoq vaqtga emas. Nam choyshablarni esa derazalarga osgan ma'qulroqdir.

3. Muzdan foydalanish

Xonalarni sovitishning yaxshi usullaridan yana biri - muzlatilgan suv idishlaridir. Bunday idishlarning bir nechtasidan foydalanish mumkin, masalan, 5-6 litr muzlatilgan suv haroratni kamida 3 yoki undan ham ko'proq darajaga kamaytirishga yordam beradi. Ularni balandroq, masalan, javon ustiga yoki shamol parraklarining qarshisiga qo'yilsa, havo yanada kuchliroq sovitiladi.

Foto: rsute.ru

Keraksiz joylarni berkitish

Ko'pincha dahliz har doim salqinroq bo'ladi, shuning uchun kerakli xonaga salqin havo kirishini ta'minlash uchun eshiklarni ochib qo'yish mumkin. Bundan tashqari, derazalarni parda bilan berkitish va yopish orqali kamroq foydalanadigan xonalarning eshiklarini yopiq holda saqlashingiz mumkin. Bu uyni salqin salqinlatishga yordam beradi. Kechasi esa, barcha derazalar va ichki eshiklarni ochib qo'yish ma'qulroq.

Oshxonada isitish moslamalarining ko'pligi tufayli harorat har doim eng yuqori darajada bo'ladi, ayniqsa taom tayyorlash vaqtida. Agar gaz yoki elektr pech ishlayotgan bo'lsa, bu vaqt ichida havo tozalovchi uskunani (vityajka) maksimal darajada yoqish yoki xonani shamollatish kerak bo'ladi. Shuningdek, havo mikroto'lqinli pech va tayyorlangan ovqatlar tufayli ham isib ketishi mumkin, shuning uchun oshxona eshigini yopib qo'yish maqsadga muvofiqdir.

Xonani shamol parrak yordamida to'g'ri sovutish

Ko'pchilik odamlar shamol parrakni o'zlari tomonga yo'naltirib joylashtirishadi, ammo bu mutlaqo noto'g'ri. Shamol parrakni xonadagi mebellarga qaratib ularni sovutishi va ular o'z navbatida xonadagi boshqa narsalarning issiqligini tortib olishi eng ma'qul yo'ldir. Shamol parrak oldiga muz yoki shunchaki sovuq suv to'ldirilgan idishlarni qo'yish ham mumkin.

Issiq mavsum uchun yana bir nechta noodatiy maslahatlar. 

Yerda uxlash. Xonadagi eng salqin havo har doim xonaning pastki qismida to'planadi. Shuning uchun issiq kechada yotoqning yoniga matras qo'yib va shamollatish uchun derazalarni ochgan holda uxlash mumkin.

Ba'zi manbalarda ko'rsatilishicha, yostiqni grechka bilan to'ldirish ham foyda beradi, chunki u oddiy yostiq kabi issiqlikni o'zida saqlamas ekan. Lekin, bunday yostiqda uxlash biroz noqulay bo'lishi mumkin.

Ba'zilar issiq havoda sovuq suv ichishga harakat qiladi, lekin bu noto'g'ri. Tana yo'qotilgan issiqlikni to'ldirishga kuch sarflaydi va isib ketadi. Eng yaxshisi - issiq choy yoki iliq suv ichishdir.

Vaqti-vaqti bilan kontrast dushdan foydalanish mumkin - bunda avval iliq suv bilan, keyin esa sovuq suv bilan yuvinish lozim. Bu nafaqat yurak-qon tomir tizimini mustahkamlaydi, balki issiq havoda sezilarli darajada tetiklashtiradi.

Agar mashinangizda konditsioner bo'lmasa, orqa o'rindiqqa muzlatilgan suv idishlarini qo'yish mumkin. Avtomobildan foydalanilmaganda, uning ichki qismi quyoshda juda qizib ketmasligi uchun old oynani folga bilan yopish kerak.

Uglevodlarni kamroq iste'mol qilish va ularni tarkibida uglevodlar kam bo'lgan, masalan, qovoqcha, cherri pomidori, seldir, gulkaram va boshqa mahsulotlar bilan almashtirish yaxshiroqdir. Issiq havoda tanaga ko'p energiya kerak bo'lmaydi, shuning uchun yengil ovqatlanish yetarli bo'ladi. Bundan tashqari, tanadagi suvni ushlab turuvchi shakar, yog'li, sho'r ovqatlarni iste'mol qilishni kamaytirish lozim.

Bunday ob-havo sharoitida uy hayvonlarining sog'lig'ini kuzatish juda muhim, chunki ular odamlarga nisbatan issiqlikni ko'tara olmaydilar va issiq urishidan halok bo'lishlari mumkin. Ular uchun doim ichimlik suvi bo'lishi kerak, shuningdek ular yotadigan joylarga muz solingan idishlarni ham qo'yish mumkin. Agar uy hayvoningizning ahvoli sezilarli darajada yomonlashsa, darhol hayvonlar shifokoriga murojaat qilishingiz kerak.