Bir qator banklarning reklamasi qonunga xilof deb topildi
Foto: plusiminusi.ru
Har kuni televizor, internet va ijtimoiy tarmoqlarda turli reklamalar ko‘zga tashlanadi. Ba’zida bank omonatlari reklamalari aniq ma’lumot bermay, noto‘g‘ri qaror qabul qilish xavfini tug‘dirishi mumkin. O‘zbekiston Raqobat qo‘mitasi bunday holatlarni nazorat qilib, ularni bartaraf etmoqda. So‘nggi ikki oyda bir nechta banklar noto‘g‘ri reklama uchun jarimaga tortildi.
Universalbank: "Sarmoya 25" depoziti reklamasida yiliga 25% foiz stavkasi va’da qilingan, ammo bankning rasmiy saytida stavka 22% va 18 oylik muddat uchun ekani ko‘rsatilgan. Shuningdek, reklamada minimal depozit miqdori va boshqa muhim tafsilotlar berilmagan.
Ipak Yo‘li banki: “Universal” va “Milliy” omonatlari 22% va 25% foiz stavkasi bilan taklif qilingan bo‘lsa-da, mablag‘lar muddatidan oldin yechib olinganda foiz stavkasining kamayishi haqida to‘liq ma’lumot taqdim etilmagan.
Ipoteka-bank: "Super" nomli depozit reklamasida 26% foiz stavkasi va’da qilingan, ammo bu faqat dastlabki uch oyga tegishli bo‘lib, keyinchalik stavka 14% ga tushiriladi. Ushbu o‘zgarish reklamada ko‘rsatilmagan.
AVO bank: Reklamada «har bir yangi mijozga 250 000 so‘m» bonus va’da qilingan, lekin bu bonus aslida pul emas, balki bonus ballari ekanligi aniqlangan. Shuningdek, AVO Platinum kredit kartalari reklamasida «nol stavka» ya’ni foizsiz kredit haqida ma’lumot berilgan, ammo bu davr 45 kun davom etishi reklamada qayd etilmagan.
OFB banki (Termiz filiali): Ruxsatsiz reklama konstruksiyalari o‘rnatgan.
Ushbu banklarning faoliyati «Reklama to‘g‘risida»gi va «Iste’molchilar huquqlarini himoya qilish to‘g‘risida»gi qonunlarni buzgan deb topilib, ularga moliyaviy jarimalar belgilangan.
