Kredit olgan shaxs xorijga chiqishi mumkinmi?

Kredit qarzdorligi xorijga chiqishga to‘sqinlik qiladimi?

"O‘zbekiston Respublikasi fuqarolarining xorijga chiqish tartibi to‘g‘risida"gi nizomga ko‘ra, xorijga chiqish uchun quyidagi qoidalar amal qiladi:

• Agar shaxs bankdan kredit olgan bo‘lsa va to‘lovlarni o‘z vaqtida amalga oshirib kelsa, uning xorijga chiqishiga hech qanday cheklov yo‘q. Kredit shartlarini to‘g‘ri bajarish xorijga chiqish huquqiga ta’sir qilmaydi.
• Lekin, agar kredit qarzdorligi sudga oshirilgan va sud qarori asosida ijroga berilgan bo‘lsa, xorijga chiqishga taqiq qo‘yilishi mumkin. Bu holatda qarzdorlik to‘lanmaguncha mamlakatni tark etish taqiqlanadi.

Cheklovni qanday tekshirish mumkin?

Xorijga chiqishga cheklov bor-yo‘qligini bilish uchun Yagona interaktiv davlat xizmatlari portali (YAIDXP) orqali onlayn tarzda tekshirishingiz mumkin. Tizim qarzdorlik bo‘yicha ma’lumotlarni avtomatik tarzda, ijro hujjatlari asosida bepul taqdim etadi.

Xizmatdan foydalanish bosqichlari:

1. My.gov.uz saytiga kirib, ro‘yxatdan o‘ting yoki avvaldan ro‘yxatdan o‘tgan bo‘lsangiz, avtorizatsiyadan o‘ting.
2. "Fuqarolik" bo‘limiga kirib, "Xorijga chiqishga vaqtinchalik cheklov qo‘yilganligini tekshirish" xizmatini tanlang.
3. "Xizmatdan foydalanish" tugmasini bosing.
4. Pasport seriyasi, raqami va JSHShIRni tegishli kataklarga kiritib, yuborish tugmasini bosing.
5. Javob bir zumda ekranda paydo bo‘ladi.

Agar so‘rov natijasida "Ijro hujjatlari bo‘yicha qarzdorlik mavjud emas. O‘zbekiston Respublikasidan chiqishga cheklov aniqlanmadi" degan xabar kelsa, xorijga chiqishga hech qanday to‘siq yo‘q.

Demak, kredit to‘lovlarini vaqtida amalga oshirayotgan shaxslar xorijga bemalol chiqishi mumkin. Faqat qarzdorlik sud qarori bilan ijroga berilgan holatlarda xorijga chiqish taqiqlanishi mumkin. Cheklov bor-yo‘qligini onlayn tekshirish uchun YAIDXP orqali bepul xizmatdan foydalanishingiz mumkin.