TEMU ilovasida xarid qilish xavfsizmi?

Temu o‘zi nima?

Temu — Xitoyning PDD Holdings kompaniyasi tomonidan 2022-yilda Bostonda yaratilgan elektron savdo platformasi. 

Platforma kiyim-kechak, kosmetika, elektronika va uy uchun aksessuarlar kabi mahsulotlarni arzon narxlarda taklif qiladi. Ko‘plab mahsulotlar narxi 1, 10 yoki maksimal 50 AQSh dollarini tashkil etadi. Biroq, platformada sotilayotgan mahsulotlarning aksariyati taniqli brendlarning nusxalari bo‘lib, bu narxlar mahsulot sifatiga mos.

Platformada minimal buyurtma miqdori 188 000 so‘m etib belgilangan, ammo ba’zi hollarda bu limit o‘zgarishi mumkin. Yetkazib berish uchun Fargo, Fly Express, Jana Post va Janwen kabi bir nechta standart usullar mavjud. Ushbu xizmatlar mahsulotlarni to‘g‘ridan-to‘g‘ri manzilgacha bepul yetkazadi. Shuningdek, mahsulotlarni tanlangan punktlardan mustaqil olib ketish imkoniyati ham mavjud.

Foto: lalafo.az

Temu xaridorlarni aksiyalar, sovg‘alar, chegirma kuponlari va o‘yinlar bilan jalb qiladi, ammo ba’zi hollarda qo‘shimcha shartlar talab etiladi. Masalan, bir foydalanuvchi 3 ta mahsulotni bepul tanlash imkoniyatiga ega bo‘lgan, biroq sovg‘ani olish uchun kamida 400 ming so‘mlik xarid qilish sharti qo‘yilgan. Yana bir foydalanuvchi chegirma kuponi berilgach, mahsulot narxlari qimmatroq bo‘lganini ta’kidlagan. Boshqalar esa aksiyalar muddati cheklangan deb yozilgan bo‘lsa-da, ko‘p hollarda ular doimiy ekanini qayd etgan.

Temu ilovasidagi chegirmalar kuponi va maxsulot narxining ko'rinishi

Mahsulotlarni asosan Xitoy kompaniyalari taqdim etadi. Buyurtma yetib kelmasa, pulni qaytarib olish imkoniyati mavjud.

Temuda xarid qilish xavfsizmi?

Temu platformasi akkreditatsiyaga ega emas, bu uning mijozlar ma’lumotlarini himoya qilish masalalarida ishonchliligini savol ostiga qo‘yadi. Garchi kompaniya qonuniy ko‘rinsa-da, foydalanuvchi ma’lumotlarini qanday yig‘ishi va saqlashi borasida ko‘plab xavotirlar mavjud. 

Asosiy xavfsizlik muammolari mobil ilova bilan bog‘liq. Buning sababi, bosh kompaniya Pinduoduo 2023-yilda zararli dastur tarqatishda ayblangan. Shuni ta’kidlash kerakki, Pinduoduo faqat Xitoy bozoriga mo‘ljallangan, Temu esa asosan AQSh va xalqaro bozorlar uchun ishlaydi. Shu sababli, Temudan foydalanish shaxsiy ma’lumotlar xavfsizligi jihatidan nisbatan kamroq xavf tug‘diradi.

Mahsulot sifati va yetkazib berish masalalari. Sharhlarga ko‘ra, buyurtmalar asosan vaqtida yetkazib beriladi, lekin ba’zida sifat ta’rifga mos kelmaydi. Logistika bilan bog‘liq muammolar ham uchrab turadi. Misol uchun, buyurtma hali yetkazib berilmagan bo‘lsa-da, tizimda “yopilgan” deb ko‘rsatilishi mumkin. Bu xaridor uchun muammolar tug‘diradi, chunki u mahsulotni olmaganini isbotlash qiyin bo‘ladi. 

Temuda xavfsiz xarid qilish uchun tavsiyalar

Platformada ro‘yxatdan o‘tishda pasport ma’lumotlari va karta raqamlari kabi shaxsiy ma’lumotlar talab qilinadi. Ushbu ma’lumotlar bojxona rasmiylashtiruvi uchun zarur.

Agar Temu platformasidan foydalanishga qaror qilsangiz, quyidagi choralarni ko‘rish tavsiya etiladi:

Rasmiy veb-saytdan foydalaning.

• Xaridlarni asosan rasmiy veb-sayt orqali amalga oshiring. Kompaniya ishonchli bo‘lmasa, uning ilovasini qurilmangizga o‘rnatish tavsiya etilmaydi. 

Noyob parol yarating.

• Do‘kon platformasi uchun noyob va ishonchli parol yarating. Bir xil paroldan har xil profillarda foydalanish shaxsiy ma’lumotlaringiz xavfsizligini zaiflashtiradi.

Elektron pochta manzilini himoyalang.

• Agar iPhone foydalanuvchisi bo‘lsangiz, "Hide My Email" funksiyasidan foydalaning. Bu sizning asosiy elektron pochtangizni himoya qiladi. Boshqa foydalanuvchilar Temu uchun mo‘ljallangan alohida elektron pochta manzilini yaratishi mumkin.

Profilingizni ulamang

• Temu profilini ijtimoiy tarmoqlar yoki bank hisoblari bilan bog‘lamang. Bu sizning ma’lumotlaringizni o‘g‘irlanishdan himoya qiladi.

Sharhlarni diqqat bilan o‘qib chiqing.

• Mahsulotlar ba’zan ta’rifga mos kelmasligi mumkin. Xarid qilishdan oldin sharhlarni o‘qib, ularni boshqa platformalardagi, masalan, Tao Bao yoki AliExpressdagi sharhlar bilan solishtirish tavsiya etiladi. Shuningdek, Telegramdagi Temu foydalanuvchilari tajribalari bilan bo‘lishuvchi guruhlar ham foydali bo‘lishi mumkin.

Maxsus bank kartasidan foydalaning

• Platformada xaridlarni faqat Visa kabi xalqaro bank kartalari orqali amalga oshirish mumkin. Moliyaviy xavfsizlikni ta’minlash uchun alohida virtual kartadan foydalanishni tavsiya qilamiz. Virtual kartani onlayn ochib, xarid qilishdan oldin unga faqat kerakli mablag‘ni o‘tkazishingiz mumkin.

Xulosa

Temu platformasi arzon narxlari va keng tanlovi bilan e’tiborni tortmoqda. Biroq, mahsulot sifati, shaxsiy ma’lumotlarning xavfsizligi va yetkazib berish xizmatining sifatiga oid savollar haligacha ochiq qolmoqda. Xarid qilishdan oldin mahsulot sharhlarini o‘qib chiqish va shaxsiy ma’lumotlaringizni himoya qilish choralarini ko‘rish zarur.

Oxir-oqibat, Temudan foydalanish – bu har bir foydalanuvchining shaxsiy tanlovi. Ammo har qanday platformada bo‘lgani kabi, Temudan xarid qilishda ham ehtiyotkorlik muhimdir.