Enagalar qancha pul topadi?

Ko‘pchilik yosh onalar dekret davrida qo‘shimcha daromad topish haqida o‘ylashadi. Enagalik bu borada qulay yo‘nalishlardan biri bo‘lib, o‘z farzandi bilan uyda qolgan holda boshqa bolalarga qarash imkonini beradi. Ammo bu ish haqiqatda daromadli bo‘lishi mumkinmi? Enagalik orqali qancha pul topish mumkin? Keling, daromadlarni xizmat turlari bo‘yicha taqqoslab, ularning farqlarini ko‘rib chiqamiz.

Enaga xizmatlarining narxi bir qator omillarga bog‘liq: xizmat turi, enaganing tajribasi va ish joyi (bola uyida yoki enaga uyida) narx belgilashda asosiy rol o‘ynaydi. Quyida har xil xizmat turlariga qarab o‘rtacha narxlarni ko‘rib chiqamiz. Narxlar Toshkent shahri uchun keltirilgan bo‘lib, ular OLX platformasi va enagalar uchun maxsus telegram kanalidagi e’lonlar asosida hisoblangan.

Uyda bolaga qarash xizmatining narxlari

Ba’zi enagalar o‘z uyida bolaga qarash xizmatlarini taklif qilishadi. Bu holda narxlar enaganing tajribasi, bola parvarishi bo‘yicha qo‘shimcha sharoitlar (masalan, o‘z bolalari bilan o‘ynash imkoniyati) va boshqa qulayliklarga qarab belgilanadi. Bu turdagi xizmatlar uchun narxlar quyidagicha shakllanadi:

Soatlik xizmat: Agar enaga tajribasiz va faqat bolaga oddiy qarash xizmati ko‘rsatsa, 1 soatlik xizmat narxi 25 ming so‘mdan boshlanadi.
Kunlik xizmat: Kunlik xizmat narxi asosan 100 ming so‘m atrofida bo‘lib, eng arzon xizmat narxi 60 ming so‘mdan boshlanadi. Biroq, bunday past narxdagi xizmatlar barcha hududlarda mavjud emas. Odatda, bu narxda farzandingiz enaganing bolasi bilan birga o‘ynaydi va alohida e'tibor taqdim etilmaydi.

Tajribali enagalarning xizmat narxlari

Tajribali enagalar, ayniqsa pedagogik bilimga ega bo‘lganlar, ham o‘zining uyida, ham ota-onalarning uyida xizmat ko‘rsatishadi. Bunday xizmatlar ko‘proq narxni talab qiladi, chunki enaga bolaga individual tarzda e'tibor qaratadi va kuniga bir-necha soat pedagogik faoliyat olib boriladi:

Soatlik xizmat: Xizmat narxi 40 000 - 50 000 so‘mdan boshlanadi.
Kunlik xizmat: Bu turdagi xizmat, bir kunlik parvarish uchun 200 000 - 300 000 so‘mdan boshlanadi. Maxsus xizmatlar, masalan, bolani rivojlantirish va ta’limga e’tibor qaratilgan holda, narxlarni oshirishi mumkin.

Oylik maosh asosida ishlaydigan enagalarning xizmat narxlari

Bunday enagalar odatda shartnoma asosida ish olib boradi va bu lavozimga ko‘pincha tajribali enagalar jalb qilinadi. Oylik daromad ota-onalar tomonidan yashash joyi taqdim etilishiga va bolalarning soniga qarab farqlanadi.

Oylik daromad: Agar ota-onalar enaga uchun yashash joyini taqdim etsa va enaga to‘liq kun davomida parvarish qilsa, xizmat narxi 2-3,8 million so‘mdan boshlanadi. Bu narx bola soni ko‘paygan sayin oshishi mumkin.
Yashash joyi taqdim etilmasa: Xizmat narxi 4-5 million so‘mdan boshlanadi.

Xizmat narxlarini taqqoslaymiz

Xizmat turi

Narx oralig‘i (so‘mda)

Oylik taxminiy daromad (so‘mda)

Shartlar va qo'shimcha ma'lumotlar

Soatlik (tajriba talab qilinmaydi)

25 – 30 ming

1,5 mln – 3 mln (2-4 soat/20 kun)

Enaganing uyida, boshqa bolalar bilan birgalikda parvarish. Minimal e'tibor.

Kunlik (minimal xizmat)

60 – 100 ming

1,2 mln – 2 mln (20 kun)

Eng arzon narxdagi xizmatlar barcha hududlarda mavjud emas.

Soatlik (tajribali)

40 – 50 ming

3 mln – 6 mln (3 soat/20kun)

Enaganing uyida yoki ota-onaning uyida, alohida e'tibor va pedagogik mashg‘ulotlar.

Kunlik (tajribali)

200 – 300 ming

4 mln – 6 mln (20 kun)

Bola rivojlanishiga qaratilgan, 8-10 soat xizmat.

Oylik xizmat (to‘liq kun)

3,8 mln – 5 mln

Har kuni 8 soatlik xizmat, yashash joyi taqdim etilgan.

Oylik xizmat (yashash joyi taqdim etilmagan)

4 mln – 5 mln

Har kuni 8 soatlik xizmat, enaga har kuni ishga kelib-ketadi.

Xulosa

Soatbay ishlaydigan enagalar uchun ish kunlari qat’iy belgilanmagan, ular odatda o‘z uylarida xizmat ko‘rsatadi va ish vaqtlari ota-onalar bilan kelishuv asosida belgilanadi. Bunday enagalar o‘z xizmatlarini e’lon orqali topib, ota-onalar bilan individual shartlar asosida ishlaydi, shu sababli ish kunlari oyiga 5–10 kunga qisqarishi ham mumkin, bunda oylik daromad 1 million so‘mdan kam bo‘lish ehtimoli bor. Agar soatbay enagalar har ish kuni band bo‘lsa, ularning daromadi 6 million so‘mgacha yetishi mumkin.

To‘liq kun va shartnoma asosida ishlaydigan enagalar esa qat’iy ish jadvali va barqaror oylik maoshga ega. Bunday xizmatlarda oylik daromad odatda 3,8 milliondan 5 million so‘mgacha bo‘lib, ota-onalarning yashash joyi bilan ta’minlash shartiga ko‘ra farqlanadi. Tajribali enagalar uchun esa xizmat narxi yuqoriroq bo‘lib, ularning oylik maoshi 6 million so‘mdan oshishi mumkin.