Kuryerlar qancha pul topadi?
Foto: pr.uz
Kuryerlik ishi uchun to'lov miqdori qancha buyurtma bajarishingizga, qancha vaqt ishlashingizga va tanlangan kompaniyaning qoidalariga bog'liq. Odatda, kuryerlar har bir bajarilgan buyurtma uchun haq oladilar. Ba’zi kompaniyalar esa har bir ish soati yoki ish paytida bosib o'tgan har bir kilometr uchun to'laydilar. Ish vaqti va jadvalining moslashuvchanligi turli kompaniyalarda farq qiladi.
Xo‘sh, kuryerlik bilan shug‘ullanishni boshlasangiz, qancha daromad olishingiz mumkin? Eng mashhur kompaniyalarning takliflarini o‘rganib chiqib, bu savolga javob berishga harakat qilamiz. Ushbu ma’lumotlar faqat Toshkent shahridagi takliflarga asoslangan.
Yandex eats
Yandex kompaniyasida kuryer sifatida ishlash moslashuvchan tarzda pul ishlash imkonini beradi. Kuryerlarning daromadi ikki qismdan iborat:
- Har bir buyurtma uchun 6000 so'm,
- Bosib o'tilgan har bir kilometr uchun 1700 so'm.
Ushbu asosiy to'lovlarga 0,5 dan 3 barobargacha koeffitsiyentlar qo'shilishi mumkin. Koeffitsiyentlar ish vaqti, yetkazib berish hududi va usuli kabi turli omillarga bog'liq bo'lib, koeffitsiyentlarning 2 xil turi mavjud:
- Standart koeffitsiyent: 1 dan 3 darajagacha (bu bir qator mezonlarga bog'liq).
- Qo'shimcha koeffitsiyent: 0,5 daraja (faqat rejali slot uchun amal qiladi).
Yandex Eats kompaniyasida kuryer sifatida ishlashning ikki xil usuli mavjud:
Bo'sh slot
Bu taklif rejalashtirilmagan smena bo'lib, moslashuvchan ish jadvalini taqdim etadi. Kuryer xohlagan vaqtda ishlashni boshlashi va tugatishi mumkin.
Misol: bo'sh slot to'lovi, misol tariqasida 4 km bo'lgan buyurtmani olamiz: 6000 (1,5 standart koeffitsiyent) + 1700*4 km = 19 200 so'm.
Rejali slot
Bu taklif majburiy ish jadvalini taqdim etadigan rejalashtirilgan smenadir. Rejali slotni tanlaganda Yandex Eats tomonidan belgilangan ma’lum muddat ichida ishlash kerak.
Misol: rejali slot to'lovi, misol tariqasida 4 km bo'lgan buyurtmani olamiz: 6000 (1,5 standart koeffitsiyent + 0,5 rejali smena uchun qo'shimcha koeffitsiyent) + 1700*4 km = 25 600 so'm.
Kompaniyada minimal to'lov soatiga 8000 so'm bo'lib, u faqat rejali slotda ishlagan pulingiz minimal to'lov pulidan kam bo'lganda to'lanadi.
Yandex eats kuryerlari qancha pul topadi?
Nomzodlar o‘z daromadlarini taxminan hisoblab chiqishlari uchun Yandex Eats o‘z veb-saytida kalkulyatorni taqdim etadi. Bu kalkulyator 2023-yilning birinchi yarmidagi ma'lumotlarga asoslangan. Qizig'i shundaki, kalkulyator ma'lumotlariga ko'ra, velosipeddagi kuryerlar avtomobildagi va mototsikldagi kuryerlarga nisbatan ko'proq daromad oladi.
Oyiga 25 kun davomida 6 soatlik smena uchun turli transport vositalarida quyidagicha daromadga ega bo'lish mumkin:
Yandex Eatsda muharrirlarimiz bilan suhbatlashgan velosipeddagi kuryerlar 12 soatlik ish vaqti uchun 300 ming so‘m, mototsikldagi kuryerlar esa 11 soatlik ish vaqti uchun 650 ming so‘m daromad olishganini aytdilar.
Yandex Eatsda buyurtma qabul qilingandan so‘ng, kuryer uni bekor qila olmaydi. Buyurtmani faqat boshqa vaqtga ko‘chirish mumkin. Agar buyurtma o‘z vaqtida bajarilmasa, 70 ming so‘m jarima qo‘llaniladi.
Yandex Eats afzalliklari:
- Moslashuvchan ish jadvali.
- Ma'lum vaqtlarda eng yuqori to'lov olish imkoniyati.
Yandex Eats kamchiliklari:
- Tariflar narxi har doim ham aniq emas: yetkazib berish narxi turli omillarga qarab farq qilishi mumkin.
Uzum Tezkor
Uzumda to'lov miqdori transport turi va ish sifatidan kelib chiqqan holda turlicha bo'ladi. Quyidagi jadvalda Uzum Tezkor to'lovlari haqida qisqacha ma’lumot ko'rsatilgan:
(To'lovlar so'mda ko'rsatilgan)
| Yetkazib berish turi | Restorangacha yurilgan har bir kilometr | Restoranga kelish | Mijozgacha yurilgan har bir kilometr |
Kafolatli to‘lov* |
| Avtomobil | 1700 | 12000 | 1700 | 19 000 |
| Skuter | 1700 | 9000 | 1700 | 17 500 |
| Velosiped | 1700 | 8000 | 1700 | 15 000 |
| Piyoda | 1700 | 7000 | 1700 | 14 500 |
*Agar kuryer minimal miqdordan kamroq daromad qilgan bo‘lsa, har bir soat uchun kafolatli to‘lov oladi.
Misol: restorangacha bo'lgan masofa 2 km deb faraz qilaylik. 1700*4=6800 so'm (mijozgacha yo'l) + 3400 so'm (restorangacha yo'l) + 7000 so'm (restoranga kelish haqi) + 1700 so'm (kafolat) = 18 900 so'm.
Yandex Eats kompaniyasidan farqli o'laroq, Uzum Tezkorda daromadni taxminiy baholash uchun kalkulyator yo'q. Biroq, muharrirlarimiz bilan so'zlashgan avto kuryerlar bir smena uchun 600 ming so'm, velo kuryerlar esa 350-400 ming so'm daromad olishlarini aytishgan. Skartariss telegram kanalidan olingan maʼlumotlarga koʻra, Uzum Tezkorda piyoda ishlaydigan kuryerlar oyiga 4 million soʻmga yaqin maosh oladi. Avtomobilda ishlaydigan kuryerlar esa yanada ko'proq daromad olishadi.
Foto: zira.uz
Smenani o‘z vaqtida boshlash va tugatish zarur. Kompaniya 08:00 dan 04:00 gacha ishlaydi. Smenalar jadvali haftada uch marta e’lon qilinadi:
- Dushanba kuni soat 14:00 da, chorshanba va payshanba uchun.
- Chorshanba kuni soat 14:00 da, juma va shanba uchun.
- Juma kuni soat 14:00 da, yakshanba, dushanba va seshanba uchun.
Uzumda ham jarimalar mavjud va ular quyidagi qoidabuzarliklar uchun beriladi:
- Smenaga kelmaslik: 200 000 so‘m.
- Smenaga kechikish: kechikish vaqtiga qarab 10 000 - 30 000 so‘m.
- Xizmat ko‘rsatish qoidalarini jiddiy buzish: 100 000 so‘m.
Qoidalarga amal qilish Uzum Tezkorda yaxshi daromad olishni ta’minlaydi.
Afzalliklari
- Aniq daromad: Uzum Tezkor o'z kuryerlariga har bir buyurtma uchun qat'iy belgilangan to'lovni taklif etadi.
- Ofisgacha yurilgan masofa ham to'lanadi.
Kamchiliklari
- Jarimalarning mavjudligi.
- Istalgan vaqt ishni yakunlab bo'lmaydi, smenani tugatish zarur.
Express24
Express24 kompaniyasida xohlagan paytingizda ishni boshlab, xohlagan paytingiz yakunlasangiz bo'ladi. Ilova yordamida quyidagicha ishlash mumkin:
- Buyurtma hammaga ko'rinadi, kim ulgursa, o'sha oladi.
- Buyurtmaga shikast yetsa, zararni kuryerning o'zi qoplaydi, akkaunt vaqtinchalik bloklanishi ham mumkin.
- Naqd buyurtmaga kuryer o'zi pul to'laydi va pulni mijozga buyurtma yetkazib berish vaqtida oladi.
- Futbolka, kepka kompaniya tomonidan bepul taqdim etiladi va qaytarib berish sharti bilan olinadi (sumka 400 ming so'm).
Foto: podrobno.uz
Express24 kompaniyasida velosipeddagi va piyoda kuryerlarning ish haqi dastur tomonidan onlayn hisoblanadi. Yetkazib berish haqi buyurtma paytida ko‘rsatiladi. To‘lov miqdori ob-havo, kuryerlar soni va vaqtga qarab 15 mingdan 25 ming so‘mgacha o‘zgaradi.
Avtomobildagi kuryerlar uchun esa to‘lov hajmi standart:
- Har bir buyurtma uchun belgilangan to‘lov: 13 000 so‘m.
- Har yurilgan kilometr uchun: 1 300 so‘m.
Misol: bitta smenadagi bitta bajarilgan buyurtma uchun haqqoniy hisob bo‘lishi uchun 4 km yo‘lni misol qilib olamiz:
1 300 so‘m * 4 km = 5 200 so‘m + 13 000 so‘m (kafolat) = 18 200 so‘m.
Express24da muharrirlarimiz bilan suhbatlashgan velosiped kuryerlari 7 soatlik ish vaqti uchun 200 ming so'm daromad olishganini aytishgan.
Buyurtma qabul qilingandan keyin yetkazib berilmasa, jarima buyurtma narxiga teng.
Afzalliklari:
- Moslashuvchan ish jadvali: Kuryerlar xohlagan paytda ishni boshlashlari va tugatishlari mumkin.
- Erkin buyurtma tanlash: Buyurtmalar hammaga ko‘rinadi va kim ulgursa, o‘sha oladi.
Kamchiliklari:
- Standart to‘lov faqat avtomobildagi kuryerlar uchun belgilangan. Boshqa turdagi kuryerlar ish haqini oldindan hisoblay olmaydilar.
- Buyurtmaga shikast yetsa zararni kuryer qoplaydi.
Xulosa
Har bir kompaniya kuryerlar uchun o‘ziga xos ish sharoitlari va imkoniyatlarini taklif qiladi. Yandex Eats moslashuvchan smenalar va qo‘shimcha koeffitsiyentlar orqali yuqori daromad olish imkoniyatini beradi. Uzum Tezkor esa qat’iy smenalar va aniq belgilangan to‘lovlar bilan tartibli ishni ta’minlaydi. Express24 kuryerlarga ish vaqtini mustaqil tanlash imkoniyatini berib, buyurtmalarni tez olish tizimini qo‘llaydi.
O‘zbekistonda boshqa kuryerlik kompaniyalari ham mavjud bo‘lib, ular maqolamizda ko‘rsatilmagan.
